~~META:
title = Пімен Панчанка — Не спявай мне песню пра арэлі...
&keywords = Панчанка, спявай, мне, песню, арэлі
&abstract = Чытаць верш Пімена Панчанкі "Не спявай мне песню пра арэлі..."
&iftrue = nan
~~

====== Пімен Панчанка — Не спявай мне песню пра арэлі... ======
Не спявай мне песню пра арэлі\\
I пра сон дзяўчыны на зары...\\
Азвярэлі людзі, азвярэлі.\\
Вы даруйце, добрыя звяры.\\
Не знаёмы вам злачынцаў сродкі:\\
Трэба толькі ежа вам, не кроў...\\
Б’юць жанчын цяжарных,\\
Рэжуць глоткі,\\
Забіваюць, п’яныя, бацькоў.\\
Прагныя, пачварныя істоты\\
Б’юць з-за грошай, рэчаў залатых.\\
Восень...\\
Парыжэла ўся лістота,\\
Паніжэлі голыя сады.\\
Мудрыя народныя асновы,\\
Мы без вас у жорсткасці згарым!\\
Кожны год да нас прыходзіць новым,\\
Адыходзіць змрочным і старым.\\
Ад нявер’я і тугі не плачу,\\
Веру:\\
Дабрыня людская ёсць —\\
Толькі ў працы з поўнаю аддачай,\\
I ў каханні шчырым і гарачым,\\
I ў вачах даверлівых дзіцячых,\\
Дзе яшчэ не начавала злосць.

 


===== Падобныя старонкі =====
  * [[творы/пімен-панчанка/пімен-панчанка-сармацкае-кадзіла]]
  * [[творы/пімен-панчанка/пімен-панчанка-зварот]]
  * [[творы/пімен-панчанка/пімен-панчанка-сармацкае-кадзіла-гдз]]
  * [[творы/пімен-панчанка/духоўны-свет-лірычнага-героя-ў-паэзіі-пі]]
  * [[творы/пімен-панчанка/пімен-панчанка-вясёлай-маланкаю-ластаўка]]