~~META:
title = Пімен Панчанка — Не люблю я слова «пакарыцель»...
&keywords = пакарэнне, люблю, слова
&abstract = Чытаць верш Пімена Панчанкі "Не люблю я слова «пакарыцель»..."
&iftrue = nan
~~

====== Пімен Панчанка — Не люблю я слова «пакарыцель»... ======
Не люблю я слова «пакарыцель»,\\
Не люблю я слова «ўладар»,\\
Вось зямля зялёная – бярыце\\
Для жыцця, і працы, і для мар.\\
\\
Хто ўладарыць, той і ўдарыць раптам\\
На падзеі, па душы жывой.\\
Пакарэнне пахне трохі рабствам,\\
Карай, і рабункам, і крывёй.\\
\\
Пакарыць хацелі нас,\\
I мукі\\
Спаленай Хатыні – не забыць.\\
Для людскога шчасця, для навукі\\
Хочацца і лётаць, і рабіць.\\
\\
Сваякі Міклухі, а не Стэнлі,\\
Мы асвоім шмат і абжывём,\\
Пракладзём дарогі праз пустэльні,\\
Гнёзды салаўіныя саўём.\\
\\
Пакарэнне – гэта не карэнне\\
Будучых прасветленых эпох.\\
Для стварэння лепшых пакаленняў\\
Трэба помніць гора ўсіх дарог.\\
\\
Акіян і космас вывучайце\\
З добрым сэрцам,\\
А яшчэ прашу:\\
Пакідайце і буслу, і чайцы\\
Больш вады і неба на душу.

 


===== Падобныя старонкі =====
  * [[творы/пімен-панчанка/пімен-панчанка-вясёлай-маланкаю-ластаўка]]
  * [[творы/пімен-панчанка/пімен-панчанка-сармацкае-кадзіла]]
  * [[творы/пімен-панчанка/пімен-панчанка-зварот]]
  * [[творы/пімен-панчанка/духоўны-свет-лірычнага-героя-ў-паэзіі-пі]]
  * [[творы/пімен-панчанка/пімен-панчанка-сармацкае-кадзіла-гдз]]