~~META:
title = Пімен Панчанка — Не адцураюся, не адракуся
&keywords = роднай, адцураюся, адракуся, Беларусь
&abstract = Чытаць верш Пімена Панчанкі "Не адцураюся, не адракуся"
&iftrue = nan
~~

====== Пімен Панчанка — Не адцураюся, не адракуся ======
Дружа Быкаў,\\
Не трэба ніякіх сенсацый:\\
Я – сірата\\
Без маёй Беларусі.\\
Ад роднай мовы,\\
Ад роднай нацыі\\
Не адцураюся,\\
Не адракуся!\\
\\
Я не журуся\\
Пра казачны век залаты,\\
Я не захоплены\\
I старажытнасцю моднаю...\\
I напісаў не аб тым я,\\
А толькі аб тым:\\
З ласкі чыноўнікаў\\
Родная мова ў намордніку,\\
\\
А былі ж партызаны,\\
Пераможна грымелі баі,\\
Гарэла зямля\\
Пад нагой акупантаў.\\
Падмянілі народ:\\
Былі ў нас працавітыя ўсе,\\
А цяпер – гультаі, халуі...\\
I на горкую памяць\\
Падкінулі нам Курапаты.\\
\\
Куды падацца\\
Вучням з беларускай?\\
Ляны бюракрат\\
Затыкае ім рот.\\
Да таго ж у ВНУ\\
Праход быў занадта вузкі:\\
Па званку,\\
Па блату\\
Ці за хабар\\
Лез прабіўны народ.\\
\\
Дзеці ўжо не ведаюць\\
Родныя назвы\\
Кветак і птушак,\\
Кустоў і травы.\\
Яны не адрозняць\\
Граба ад вяза,\\
Дзе жаўна, дзе пліска,\\
А дзе журавы?\\
\\
Адлучылі ад прыроды...\\
Не шукаюць унукі слядоў\\
Ні сваіх франтавых дзядоў,\\
Ні далёкіх і страшных гадоў.\\
I рыканне кароў,\\
I рык звяроў,\\
I сусветная рок-істэрыка –\\
Толькі па тэлеку,\\
Толькі па тэлеку.\\
\\
...Да роднай зямлі я\\
Душою і сэрцам прыкуты,\\
Куваюць зязюлі,\\
Клякочуць буслы на маёй Беларусі.\\
Ты радасць мая, Беларусь,\\
Ты гора маё і пакута,\\
I ад цябе я ніколі\\
Не адцураюся,\\
Не адракуся!

 


===== Падобныя старонкі =====
  * [[творы/пімен-панчанка/пімен-панчанка-вясёлай-маланкаю-ластаўка]]
  * [[творы/пімен-панчанка/пімен-панчанка-сармацкае-кадзіла]]
  * [[творы/пімен-панчанка/духоўны-свет-лірычнага-героя-ў-паэзіі-пі]]
  * [[творы/пімен-панчанка/пімен-панчанка-сармацкае-кадзіла-гдз]]
  * [[творы/пімен-панчанка/пімен-панчанка-зварот]]