~~META:
title = Пімен Панчанка — Непрымірымасць
&keywords = Панчанка, непрымірымасць
&abstract = Чытаць верш "Непрымірымасць" Пімена Панчанкі
&iftrue = nan
~~

====== Пімен Панчанка — Непрымірымасць ======
Мы ў сэрцах пранеслі\\
Праз кожны бой\\
На зямлі,\\
Што прапахла порахам,\\
Боль і любоў,\\
Боль і любоў\\
I нянавісць да ворага.\\
\\
Калі адгрымела\\
Крывавае і страшнае,\\
Мы працавалі\\
I ў будныя дні, і ў нядзелі.\\
Ды ў складаным жыцці\\
Мы прагледзелі\\
Нешта важнае,\\
I пазмрачнелі нашы надзеі.\\
\\
Мы ведаем хто\\
Загнаў у тупік нашы справы,\\
Сёння нас не аслепіць\\
Яркасць хлуслівага грыму.\\
У нашых сэрцах,\\
Што так цяжка дайшлі да праўды,\\
Непрымірымасць,\\
Непрымірымасць\\
\\
Да прыхільнікаў\\
Валу, завалу, развалу,\\
Падману, прыпісак,\\
Гультайства і спажывецтва.\\
Трэба, каб наша справа\\
Заўжды хвалявала\\
I родны народ,\\
I ўсё чалавецтва.\\
\\
Недарэмна лілася\\
Салдацкая кроў:\\
Сумленне і справядлівасць\\
Мы адновім\\
Навечна.\\
Мы зробім сваю зямлю\\
Зямлёй сапраўдных майстроў,\\
Самай праўдзівай\\
I чалавечнай.

 


===== Падобныя старонкі =====
  * [[творы/пімен-панчанка/пімен-панчанка-сармацкае-кадзіла-гдз]]
  * [[творы/пімен-панчанка/духоўны-свет-лірычнага-героя-ў-паэзіі-пі]]
  * [[творы/пімен-панчанка/пімен-панчанка-зварот]]
  * [[творы/пімен-панчанка/пімен-панчанка-вясёлай-маланкаю-ластаўка]]
  * [[творы/пімен-панчанка/пімен-панчанка-сармацкае-кадзіла]]