~~META:
title = Пімен Панчанка — Дзеці вайны
&keywords = здасца, першы
&abstract = Чытаць верш Пімена Панчанкі "Дзеці вайны"
&iftrue = nan
~~

====== Пімен Панчанка — Дзеці вайны ======
Ім не спявалі маткі калыханкі,\\
Яны не чулі казак ад дзядоў,\\
Палохаў іх ахрыплы голас танка,\\
Трывожыў іх журботны енк удоў.\\
\\
Яны не плакалі бяссоннымі начамі,\\
Калі ад бомбаў неслі іх у склеп.\\
І словы першыя, якім іх навучылі,\\
Былі пра немцаў, пра вайну і хлеб.\\
\\
Заціхнуць бітвы. Вораг будзе знішчан.\\
І дзеці прычакаюць таго дня,\\
Калі з-пад воблака ўпадзе на папялішчы,\\
Як цёплы дождж, густая цішыня.\\
\\
Нясмела з хат яны у поле выйдуць,\\
Каб першы раз спакойна у жыцці\\
Палюбавацца родным краявідам,\\
Паслухаць звон рачулкі у трысці.\\
\\
Пі пах лугоў, красой гаёў любуйся!\\
І ўсё ж іх сэрцы задрыжаць не раз:\\
Ім здасца самалётам першы бусел,\\
Пажарам здасца першая зара.\\
\\
Лагодны гром за дальняю дубровай\\
Напомніць ім пра жах бамбардзіровак.\\
І часта, часта ў чыстыя іх сны\\
Ўрывацца будуць галасы вайны.\\
\\
1942\\
\\


Крыніца: Панчанка П. Збор твораў: У 4-х т. Том 1. Вершы і паэмы (1963-1981 гг.). Выбраныя пераклады. – Мн.: Маст. літ., 1981. – 366 с.

 


===== Падобныя старонкі =====
  * [[творы/пімен-панчанка/пімен-панчанка-сармацкае-кадзіла]]
  * [[творы/пімен-панчанка/пімен-панчанка-сармацкае-кадзіла-гдз]]
  * [[творы/пімен-панчанка/пімен-панчанка-вясёлай-маланкаю-ластаўка]]
  * [[творы/пімен-панчанка/духоўны-свет-лірычнага-героя-ў-паэзіі-пі]]
  * [[творы/пімен-панчанка/пімен-панчанка-зварот]]