~~META:
title = Пімен Панчанка — Даруй, зямля мая, за дробныя грахі...
&keywords = Панчанка, даруй, зямля, дробныя, грахі
&abstract = Чытаць верш Пімена Панчанкі "Даруй, зямля мая, за дробныя грахі..."
&iftrue = nan
~~

====== Пімен Панчанка — Даруй, зямля мая, за дробныя грахі... ======
Даруй, зямля мая, за дробныя грахі,\\
А буйных я не меў:\\
Адданым быў салдатам.\\
Я часам быў сляпы,\\
А часам быў глухі\\
I пеў хвалу\\
Усім чырвоным датам.\\
\\
Ці ёсць паэзія?\\
Паэзіі няма.\\
Усё закрэсліла наўкол\\
Лібералізацыя.\\
У сэрцы многіх усялілася зіма,\\
I людзі добрыя ў трамваі едуць «зайцамі»...\\
\\
А я сцвярджаю так:\\
Паэзія ў нас ёсць!\\
Яна ў дзіцячым шчабятанні зранку.\\
Калі з душы тваёй адхлыне злосць,\\
Ты здзівішся далёкаю заранкай,\\
\\
I шэлестам ліствы,\\
Па-веснавому свежай,\\
I свежасцю Максімава «Вянка»...\\
Усё табе спрадвеку тут належа,\\
Да працы добрай цягнецца рука.\\
\\
I зразумелымі стануць сны, жаданні,\\
Каханне маладых\\
I сэрцаў перастук.\\
I верыш ты, што нашы спадзяванні,\\
Як зерні жыта, хутка прарастуць.\\
\\
Зязюля пачала\\
Адлік жыцця нам строгі,\\
А ў лесе зноў пайшлі баравікі.\\
Як спіны разагнём,\\
Паразумнеем трохі\\
I злыдні не саб’юць\\
3 народнае дарогі,\\
То нашай Беларусі\\
Жыць і жыць вякі!

 


===== Падобныя старонкі =====
  * [[творы/пімен-панчанка/пімен-панчанка-зварот]]
  * [[творы/пімен-панчанка/пімен-панчанка-сармацкае-кадзіла]]
  * [[творы/пімен-панчанка/пімен-панчанка-сармацкае-кадзіла-гдз]]
  * [[творы/пімен-панчанка/пімен-панчанка-вясёлай-маланкаю-ластаўка]]
  * [[творы/пімен-панчанка/духоўны-свет-лірычнага-героя-ў-паэзіі-пі]]