~~META:
title = Пімен Панчанка — Вясною
&keywords = шэры, лепшы, дрозд
&abstract = Чытаць верш Пімена Панчанкі "Вясною"
&iftrue = nan
~~

====== Пімен Панчанка — Вясною ======
Жылы дрэў напоўніліся сокам,\\
Ручаі імкнуцца да ракі.\\
Неба стала чыстым і высокім,\\
I пяюць вясёлыя шпакі.\\
\\
Ўсё вясна старанна падлічыла,\\
Сонцам абагрэла кожны кут.\\
Паляўнічым прынясла дзічыны,\\
Рыбакам расчысціла раку.\\
\\
Рыбы абудзіліся з застою,\\
А ваўкі халодныя насы\\
Узнялі на воблака густое\\
I спрабуюць ціха галасы.\\
\\
На паляне ў светлым пералеску\\
Расцвілі налітыя расой\\
Сінія падснежныя пралескі\\
Пад аховай урачыстых хвой.\\
\\
Я пакінуў хату, кінуў вершы,\\
Блукаю па лесе, як дзівак.\\
Мяне кліча ў госці друг мой лепшы –\\
Шэры дрозд, цудоўнейшы спявак.\\
\\
Пах смалісты п'ю і не нап’юся,\\
I пад гром птушыных галасоў\\
Да бярозы белай прыхінуся, –\\
Буду прагна піць салодкі сок.\\
\\
I тады нальецца цела сілай,\\
Гэтай сілы радасць зберагу,\\
Каб яна мяне перанасіла\\
Праз бяду, і ворагаў касіла,\\
I знішчала чорную тугу.

 


===== Падобныя старонкі =====
  * [[творы/пімен-панчанка/пімен-панчанка-вясёлай-маланкаю-ластаўка]]
  * [[творы/пімен-панчанка/пімен-панчанка-зварот]]
  * [[творы/пімен-панчанка/пімен-панчанка-сармацкае-кадзіла-гдз]]
  * [[творы/пімен-панчанка/пімен-панчанка-сармацкае-кадзіла]]
  * [[творы/пімен-панчанка/духоўны-свет-лірычнага-героя-ў-паэзіі-пі]]