~~META:
title = Пімен Панчанка — Аб самым смачным...
&keywords = прыпяццю, дэга, буслы, божа, гані
&abstract = Чытаць верш Пімена Панчанкі "Аб самым смачным"
&iftrue = nan
~~

====== Пімен Панчанка — Аб самым смачным... ======
Аб самым смачным\\
Жаб’ім кракацінні\\
Буслы клякочуць\\
I глядзяць: «Дзе гай,\\
А дзе дрыгва і ціна?»\\
Буслы стаяць,\\
Як балерыны на карцінах\\
У мастака Дэга.\\
\\
Было так па-над Прыпяццю\\
Учора...\\
А сёння ўсюды цьмяна, дымна, чорна,\\
Не звіняць у небе жаўрукі...\\
Божа, не гані мяне ў пячоры,\\
Божа, не гані у глыб ракі!\\
\\
Які Дэга?\\
Тут пахне Хірасімай.\\
Няма слядоў бусліных\\
І ласіных:\\
Над Прыпяццю –\\
Нябачнай смерці след.\\
Палескі край,\\
Як пазмрачнеў твой свет.\\


\\
Крыніца: Панчанка П. Горкі жолуд: Вершы. – Мн.: Маст. літ., 1988. – 63 с.

 


===== Падобныя старонкі =====
  * [[творы/іншае/сучасная-літаратура-беларусі/тэма-чарнобыля-ў-беларускай-паэзіі]]
  * [[творы/мікола-мятліцкі/мікола-мятліцкі-санеты-чарнобыля]]
  * [[творы/артур-вольскі/артур-вольскі-боль-чарнобыля]]
  * [[творы/алесь-пісьмянкоў/алесь-пісьмянкоў-1986]]
  * [[творы/максім-танк/максім-танк-самае-доўгае-расстанне]]