~~META:
title = Пятрусь Макаль — Чарадзейная скарбонка
&keywords = словы, скарб, пачулі
&abstract = Верш Петруся Макаля "Чарадзейная скарбонка"
&iftrue = nan
~~

====== Пятрусь Макаль — Чарадзейная скарбонка ======
Ты крані яе рукою –\\
загаворыць звонка-звонка.\\
Ці не знаеш,\\
што такое\\
чарадзейная скарбонка?\\
Тут –\\
не фарбы-самацветы,\\
не бліскучыя манеты.\\
Ну, а скарб тут адмысловы –\\
словы,\\
словы,\\
словы,\\
словы...\\
Тут –\\
здараецца часамі –\\
з мышкай дружыць\\
кот з вусамі;\\
згодна скача ў танцы лоўкім\\
грозны зайка\\
з мілым воўкам.\\
Тут – нібы дзяцей, бясконца\\
вецер каласы люляе.\\
З месяцам пад вечар сонца\\
тут у хованкі гуляе...\\
Тут –\\
у дзень святочны ў госці\\
запрашае дзяцел маму –\\
вострай дзюбай на бяросце\\
адбівае тэлеграму...\\
Доўга скарб збіралі гэткі\\
і матулі,

і дзядулі,

каб яго пачулі дзеткі,\\
каб дарослыя пачулі.\\
Пабяжыць наперагонкі\\
да цябе\\
за казкай казка\\
з чарадзейнае скарбонкі...\\
Дык паслухай, калі ласка!

 


===== Падобныя старонкі =====
  * [[творы/пятрусь-макаль/пятрусь-макаль-табе-бацькоўская-зямля]]
  * [[творы/пятрусь-макаль/пятрусь-макаль-смак-яблыка]]
  * [[творы/пятрусь-макаль/творчасць-петруся-макаля]]
  * [[творы/пятрусь-макаль/пятрусь-макаль-поле-поле]]
  * [[творы/пятрусь-макаль/пятрусь-макаль-два-кубкі]]