~~META:
title = Пятрусь Макаль — Воўк і ліса
&keywords = воўк, ліса, Леў
&abstract = Чытаць верш "Воўк і ліса" Петруся Макаля
&iftrue = nan
~~

====== Пятрусь Макаль — Воўк і ліса ======
Занядужаў, захварэў\\
Цар звяроў магутны Леў.\\
У яго пад вечар дома\\
Пазбіраліся звяры,\\
Спачуваючы, вядома,\\
Як сапраўдныя сябры...\\
Не прыйшла Ліса адна.\\
«Вось дык гэта навіна!\\
Пачакай!» падумаў Воўк\\
І зубамі шчоўк ды шчоўк.\\
І пра гэта ціха, глуха\\
Ён Ільву шапнуў на вуха.\\
Узлаваўся хворы Леў\\
І ад гневу аж збялеў.\\
Сіплым голасам зароў,\\
Напалохаўшы звяроў:\\
– Ток, хто ўбачыць,\\
Хай адразу\\
Да мяне вядзе Лісу,\\
Шалахвостку за абразу\\
На кавалкі разнясу!\\
Як дачулася пра гэта\\
У нары Ліса кума,\\
Дык прыбегла з-за паўсвета\\
У бярлог Ільва сама.\\
У вачах хітрынкі скачуць,\\
Закруціўся хвост трубой,\\
– Ты хацеў мяне пабачыць –\\
Вось і я перад табой.\\
Грозны Леў гукнуў ад гневу,\\
Аж загойдаліся дрэвы:\\
– Бач, мяне прыйшлі наведаць,\\
Як сябры,\\
Усе звяры..\\
Ну, а ты?\\
Хачу я ведаць,\\
Дзе была ты?\\
Гавары!\\
А Ліса Ільву ў адказ\\
Праспявала ў той жа час:\\
– О лясны магутны цар!\\
Памяркуй, мой валадар,\\
Ды хіба віна мая,\\
Што хацела вельмі я\\
Для тваёй ільвінай чэсці\\
Вестку добрую прынесці?\\
Гаспадар ляснога царства,\\
У трывозе і ў журбе\\
Сёння цэлы дзень лякарства\\
Я шукала для цябе...\\
– Што ж, хвалю! –\\
Усклікнуў Леў\\
І адразу пасвятлеў.\\
– Дзе ж лякарсгва?\\
Дай хутчэй!..\\
Можа, стане мне лягчэй.\\
Галаском ліслівым Ліска\\
Адказала:\\
– Лекі блізка.\\
Лекі Воўк схаваў у пятку.\\
Вып'еш іх – і ўсё ў парадку.\\
Пойдуць прэч хваробы ўсе...\\
...Леў падзякаваў Лісе\\
За ратунак ад бяды.\\
І гукнуў:\\
– Ваўка сюды!\\
Ну, а ўсе адгэтуль – вон!\\
Прамінула колькі дзён.\\
I Ліса на шпацыр выйшла,\\
Прытанцоўваючы ўвішла.\\
Ажно бачыць –\\
Сярод гаю\\
Па імху, па мурагу\\
Воўк павольна чыкільгае,\\
Ледзьве цягнучы нагу.\\
Глянула кума з дакорам\\
На старога плеткара:\\
– Будзеш помніць –

нагаворы

Не даводзяць да дабра!

 


===== Падобныя старонкі =====
  * [[творы/пятрусь-макаль/пятрусь-макаль-табе-бацькоўская-зямля]]
  * [[творы/пятрусь-макаль/пятрусь-макаль-два-кубкі]]
  * [[творы/пятрусь-макаль/пятрусь-макаль-поле-поле]]
  * [[творы/пятрусь-макаль/творчасць-петруся-макаля]]
  * [[творы/пятрусь-макаль/пятрусь-макаль-смак-яблыка]]