~~META:
title = Пятрусь Макаль — Асенняе
&keywords = лета, ніжай
&abstract = Чытаць верш Петруся Макаля "Асенняе"
&iftrue = nan
~~

====== Пятрусь Макаль — Асенняе ======
Расу на травы ніжа\\
Пад вечар цішыня.\\
А сонца ніжай, ніжай,\\
I халадней штодня.\\
Трапеча аблачынка\\
У белай чарадзе,\\
Як школьніца-дзяўчынка,\\
Што ў першы клас ідзе.\\
Рабіна заірдзела –\\
Нібы агнём цвіце,\\
Ды лета адляцела\\
У вырай на лісце.\\
Папрацавала лета –\\
Збірала дзень пры дні\\
У бэрах і ранетах\\
Скарбонкі цеплыні.\\
I нас цяпер, увосень,\\
Не спудзяць халады:\\
Як сонцы, мы падносім\\
Да губ сваіх плады.\\
Смяёмся мы шчасліва –\\
Да новых весніх дзён\\
Нас будзе грэць рупліва\\
Багаты летні плён.

 


===== Падобныя старонкі =====
  * [[творы/пятрусь-макаль/пятрусь-макаль-табе-бацькоўская-зямля]]
  * [[творы/пятрусь-макаль/пятрусь-макаль-два-кубкі]]
  * [[творы/пятрусь-макаль/пятрусь-макаль-смак-яблыка]]
  * [[творы/пятрусь-макаль/пятрусь-макаль-поле-поле]]
  * [[творы/пятрусь-макаль/творчасць-петруся-макаля]]