~~META:
title = Пятрусь Броўка — Як ліст дубовы...
&keywords = багна
&abstract = Верш Пятруся Броўкі "Як ліст дубовы..."
&iftrue = nan
~~

====== Пятрусь Броўка — Як ліст дубовы... ======
Не страшна мне\\
Ні твань, ні багна,\\
Ані віхуры гул і свіст –\\
Я за жыццё схапіўся прагна,\\
Як за галлё\\
Дубовы ліст.\\
\\
Па восені,\\
Мядзяны, дужы,\\
Між хмурай стыні ён гарыць...\\
Трасуць яго вятры і сцюжы,\\
А ён адно ў адказ -\\
Звініць.\\
\\
Калі зімой\\
Мятлюга грае\\
І злосна шчэрыцца мароз,\\
Ён, як далонню, прыкрывае\\
Галінку тую,\\
Дзе прарос.\\
\\
І толькі ў ясны дзень\\
Вясновы,\\
Калі красуе ўсё вакол, –\\
Перад лістком зялёным, новым\\
Ён ціха падае\\
На дол.\\
\\
1956

 


===== Падобныя старонкі =====
  * [[творы/пятрусь-броўка/асноўныя-матывы-вобразы-і-мастацкія-асаб]]
  * [[творы/пятрусь-броўка/творчасць-петруся-броўкі]]
  * [[творы/пятрусь-броўка/пятрусь-броўка-зямля-беларусі-урывак-з-п]]
  * [[творы/пятрусь-броўка/пятрусь-броўка-кропля]]
  * [[творы/пятрусь-броўка/пятрусь-броўка-кастусь-каліноўскі]]