~~META:
title = Пятрусь Броўка — Над возерам
&keywords = ракіт, блакіт, хваль
&abstract = Верш Петруся Броўкі "Над возерам"
&iftrue = nan
~~

====== Пятрусь Броўка — Над возерам ======
Стаю над возерам вясной,\\
Усё спавіта цішынёй.\\
Гляджу – а ў ім паміж ракіт\\
Нябёс гайдаецца блакіт,\\
Не то пад колер васілька,\\
Не то пад вочы юнака.\\
\\
Прыйшоў я ўвосень паглядзець –\\
Ужо лістоў гамоніць медзь,\\
І зашарэлася ўжо скрозь,\\
Здаецца, ўзрушыў хвалі хтось –\\
Разбегліся ва ўсе бакі,\\
Нібы на твары маршчакі.\\
\\
Я быў і ўзімку ў месцы тым –\\
Пад пакрывалам ледзяным\\
Не чуць ані гамонкі хваль,\\
Завеі засланілі даль.\\
І возера часінай той\\
Заснула ў пене снегавой.\\
\\
Але не век яму да сна,\\
Я знаю – ўзнімецца вясна,\\
І паміж хваль у цвеце дрэў\\
Пачне кружыць птушыны спеў,\\
І ў ціхім люстры між ракіт\\
Зноў загайдаецца блакіт.

 


===== Падобныя старонкі =====
  * [[ibdc.ped>самае-глыбокае-возера]]
  * [[ibdc.ped>свіцязь]]
  * [[ibdc.ped>на-беразе-нарачы]]
  * [[ibdc.ped>навальніца-на-возеры]]
  * [[ibdc.ped>лясное-возера]]