~~META:
title = Пятрусь Броўка — Музыка
&keywords = музыка
&abstract = Чытаць верш "Музыка" Петруся Броўкі
&iftrue = nan
~~

====== Пятрусь Броўка — Музыка ======
Ці чулі вы, як рана-рана,\\
Калі раса па ўсёй зямлі,\\
Ўзлёт музыкі неспадзянай:\\
Ну, як сапраўдныя арганы,\\
Так граюць гай, сады, палі...\\
\\
Ах, як нам блізка і знаёма\\
З гадоў дзіцячых, маладых –\\
Вясновых рэчак дзіўны гоман,\\
Дажджоў цымбалы, бубны грому,\\
Жалейкі птушак паміж іх.\\
\\
А чулі вы, як восень просіць\\
Нас на канцэрт па сто ладоў,\\
А можа, чуць вам давялося,\\
Як грае ноч на скрыпках сосен\\
Смычкамі восеньскіх вятроў?\\
\\
I мне, прызнацца, з кожным годам\\
Зямлі гучанне ўсё мілей,\\
I ўдзень, і ўноч, ажно да ўсходу\\
Я пазнаваю, як прырода\\
Вучыла музыцы людзей.

 


===== Падобныя старонкі =====
  * [[ibdc.ped>-апасіяната]]
  * [[ibdc.ped>музыка]]
  * [[творы/якуб-колас/служэнне-народу-асноўны-абавязак-мастака]]
  * [[ibdc.ped>зрабі-гучней]]
  * [[ibdc.ped>музыка-3642]]