~~META:
title = Пятрусь Броўка — Люблю вітаць вясны спатканне...
&keywords = вясны, гром
&abstract = Чытаць верш Петруся Броўкі "Люблю вітаць вясны спатканне..."
&iftrue = nan
~~

====== Пятрусь Броўка — Люблю вітаць вясны спатканне... ======
Люблю вітаць вясны спатканне,\\
Яна, пакуль не ўдарыць гром,\\
Упершыню нясмела гляне\\
Пралескі сінім аганьком.\\
\\
А потым грукне ў шыбы хаты,\\
Паразмяце снягоў гарбы,\\
Пасля раскрые вачаняты\\
Панадазёрнае вярбы.\\
\\
Растопіць лёд у рэчках сіні,\\
Запросіць птушак на палі,\\
А там – глядзіш – ужо галіны\\
Загаманілі, загулі.\\
\\
А там праходзяць дні за днямі\\
Пад ясны, прамяністы звон –\\
Дубы зялёнымі рукамі\\
Браць неба цягнуцца ў палон.\\
\\
Ды цяжка з небам ім змагацца,\\
Калі б яно было бліжэй.\\
I застаецца ім спрачацца,\\
Хто зеляней,\\
А хто сіней.

 


===== Падобныя старонкі =====
  * [[ibdc.ped>гуканне-вясны]]
  * [[творы/якуб-колас/якуб-колас-вясна]]
  * [[ibdc.ped>абуджэнне-3649]]
  * [[ibdc.ped>сустрэча-вясны]]
  * [[ibdc.ped>прыход-вясны]]