~~META:
title = Пятрусь Броўка — Красаванне
&keywords = красавання, нічога, краю
&abstract = Чытаць верш "Красаванне" Петруся Броўкі
&iftrue = nan
~~

====== Пятрусь Броўка — Красаванне ======
Ёсць прыгажосць у ранку праменным,

ёсць і ў змярканні,

Толькі нічога не знаю прыгожай,

як час красавання.

Як разліюцца белыя вішні,

а слівы, а бэры,

А буйныя ружы, а мак легкакрылы,

а сціплы той верас,

А гляньце, як тварам сваім ганарыцца

сланечнік высокі...

Чакайце, прыгледзьцеся,

вось-вось успыхнуць дзявочыя шчокі.

Глядзіце, вакол вас бушуе і пеніць

ад краю да краю.

Мільёны гадоў – для планеты юнацтва,

зямля маладая!

I мы маладыя, і думак узлёты,

і радасць кахання.

Нічога, нічога найлепшага ў свеце,

як час красавання!

 


===== Падобныя старонкі =====
  * [[творы/пятрусь-броўка/пятрусь-броўка-кропля]]
  * [[ibdc.ped>прыгажосць-роднай-зямлі]]
  * [[творы/леанід-дранько-майсюк/леанід-дранько-майсюк-прыгажосць]]
  * [[творы/пятрусь-броўка/асноўныя-матывы-вобразы-і-мастацкія-асаб]]
  * [[ibdc.ped>жамчужына-беларускага-паазер-я]]