~~META:
title = Пятрусь Броўка — Зімовыя малюнкі
&keywords = спіць, зіма, жыта, снег
&abstract = Чытаць "Зімовыя малюнкі" Петруся Броўкі
&iftrue = nan
~~

====== Пятрусь Броўка — Зімовыя малюнкі ======
**I**

Неба.\\
Месяц.\\
Поўна зор –\\
Аж зямлі\\
Іскрыць\\
Убор.\\
Дрэва кожнае\\
Падрад –\\
Апранула\\
Маскхалат.\\
Ён і ў елкі\\
I ў сасны –\\
Як дазорныя яны.\\
Дзе ні глянь –\\
Галін штыкі,\\
Здаўна\\
Звычай іх такі:\\
– Лепш не сунься!\\
– Не чапай!\\
Гэта –\\
Партызанскі край!\\


**II**

Ой, зіма,\\
Зіма,\\
Зіма!\\
Весялей цябе\\
Няма!\\
Горка,\\
Санкі.\\
Гоман,\\
Смех.\\
Сіні вечар.\\
Белы снег.\\
Усе дзеці\\
На каньках,\\
Колькі\\
Радасці ў вачах!\\
Мчаць удоўжкі,\\
Папярок.\\
Як вулей,\\
Гудзіць каток.\\
Мчаць наўпрост\\
I наўскасяк,\\
Пішуць ногі,\\
Пішуць так,\\
Што іх пісанку,\\
Відаць,\\
Толькі небу\\
Прачытаць.\\


**ІІІ**

Выгляд зімні –\\
Ён адзін:\\
Хусткі белыя\\
Ў хацін.\\
Ды дымкі\\
На іх відны.\\
Скрозь –\\
Цыгаркі-каміны.\\
Ноч.\\
Сцішэла,\\
Спіць народ.\\
Толькі часам\\
Грукне лёд.\\
Быццам\\
Подыхам такім\\
Кажа возера\\
Усім,\\
Што і сцюжа\\
Не бяда,\\
Што жыве\\
Яго вада,\\
Што ў ягонай\\
Глыбіні\\
I платва і акупі...\\


**IV**

Снег вялізны\\
Скрозь ляжыць,\\
Пад снягамі\\
Жыта спіць.\\
I хоць вецер\\
Золь прынёс,\\
Не дапне яго\\
Мароз.\\
Жыта спіць.\\
Аб сонцы сны.\\
Дачакаецца вясны!

 


===== Падобныя старонкі =====
  * [[творы/кастусь-жук/кастусь-жук-снежань]]
  * [[творы/цішка-гартны/цішка-гартны-зімовы-вечар]]
  * [[творы/кастусь-жук/кастусь-жук-беларуская-зіма]]
  * [[ibdc.ped>зімой-у-лесе]]
  * [[творы/ларыса-геніюш/ларыса-геніюш-на-каньках]]