~~META:
title = Пятрусь Броўка — Звадыяш
&keywords = Пятрусь Броўка - Звадыяш
&abstract = Чытаць верш "Звадыяш" Петруся Броўкі
&iftrue = nan
~~

====== Пятрусь Броўка — Звадыяш ======
Ён многіх абхлусіў не раз,\\
Людзей да сваркі зводзячы,\\
Глядзіце, ходзіць звадыяш,\\
Сваю лухту гародзячы.\\
\\
Другіх памыямі абліць\\
Яму так люба-дорага,\\
Не можа ён і дня пражыць,\\
Каб не счарніць каторага.\\
\\
Брыдкі ён, ліпкі, як смаўжы,\\
Дык скажам мы заганнаму: –\\
Ану, прыйдзі і пакажы\\
Душу тваю паганую.\\
\\
I дапамогі не заві,\\
Кінь справу звадыяшную,\\
Ці, як усе, як след жыві,\\
Ці прэч з дарогі нашае.\\
\\
Бо новы чалавек прыйшоў,\\
Яго шляхі праменныя,\\
А ты – яшчэ ад тых часоў,\\
Ад свету несумленнага.\\
\\
Пакінь брыдоту, не муці,\\
Змяні натуру звадную,\\
Як хочаш разам ты ісці,\\
Раўняйся па-сапраўднаму!

 


===== Падобныя старонкі =====
  * [[творы/пятрусь-броўка/пятрусь-броўка-зямля-беларусі-урывак-з-п]]
  * [[творы/пятрусь-броўка/пятрусь-броўка-кропля]]
  * [[творы/пятрусь-броўка/творчасць-петруся-броўкі]]
  * [[творы/пятрусь-броўка/пятрусь-броўка-кастусь-каліноўскі]]
  * [[творы/пятрусь-броўка/асноўныя-матывы-вобразы-і-мастацкія-асаб]]