~~META:
title = Пятрусь Броўка — Будзь верны!
&keywords = верны
&abstract = Верш Петруся Броўкі "Будзь верны!"
&iftrue = nan
~~

====== Пятрусь Броўка — Будзь верны! ======
Увесь, як ёсць, да кроплі сілы\\
Бацькам, цябе што нарадзілі,\\
Будзь верны!\\
У дзень пагодны і ў навалу\\
Зямлі, цябе што ўзгадавала,\\
Будзь верны!\\
Палям, узгоркам і лагчынам,\\
Шляхам, дарожкам і сцяжынам\\
Будзь верны!\\
Барам, галля зялёным хвалям,\\
Табе прытулак што давалі,\\
Будзь верны!\\
Азёрам, рэчкам-чараўніцам\\
І той, з якое п’еш, крыніцы\\
Будзь верны!\\
За куст свой больш няма багацця.\\
Святой і светлай роднай хаце\\
Будзь верны!\\
Сяброўцы шчырай і каханай,\\
Сябрам, таварышам адданым\\
Будзь верны!\\
Кірунку, што ты ў сэрцы маеш,\\
Кавалку хлеба, што трымаеш,\\
Будзь верны!\\
І што б ні трапіла з табою,\\
Ты сцягу, што над галавою, –\\
Будзь верны!

 


===== Падобныя старонкі =====
  * [[творы/пятрусь-броўка/асноўныя-матывы-вобразы-і-мастацкія-асаб]]
  * [[творы/пятрусь-броўка/творчасць-петруся-броўкі]]
  * [[творы/пятрусь-броўка/пятрусь-броўка-кропля]]
  * [[творы/пятрусь-броўка/пятрусь-броўка-кастусь-каліноўскі]]
  * [[творы/пятрусь-броўка/пятрусь-броўка-зямля-беларусі-урывак-з-п]]