~~META:
title = Паўлюк Трус — Падаюць сняжынкі
&keywords = падаюць, сняжынкі, бялюткі, акном, тугі
&abstract = Урывак з паэмы Паўлюка Труса «Дзесяты падмурак»
&iftrue = nan
~~

====== Паўлюк Трус — Падаюць сняжынкі ======
Падаюць сняжынкі –\\
дыяменты-росы,\\
Падаюць бялюткі\\
за маім акном…\\
\\
Расчасалі вішні\\
шоўкавыя косы\\
І ўранілі долу\\
снегавы вянок.\\
\\
Дзесьці у прасторах\\
празвінелі бомы.\\
Дацвілі пялёсткі\\
нейчае тугі…\\
\\
І здаецца зноўку –\\
еду я дадому\\
Пераведаць родных,\\
блізкіх, дарагіх.\\
\\
Axінае вечар\\
тонкія мярэжы,\\
На акне альвасы\\
дагарэлі ў сне,\\
\\
А ў душы квяцістасць,\\
і такая свежасць,\\
І з вачэй усмешкі\\
сыплюцца на снег.\\
\\
Зноў зіма паслала\\
снежныя кілімы,\\
Зажурыла беллю\\
паплавы, лугі,\\
\\
І прыходзіць радасць\\
у красе маўклівай.\\
Адплываюць хвілі\\
смутку і тугі…\\
\\
А сняжынкі сеюць\\
кволую імглістасць,\\
Падаюць бялюткі\\
за маім акном,\\
\\
І цвіце на вішнях\\
снежная ўрачыстасць,\\
Сцелецца на скронях\\
перад раннім сном.\\
\\
Хочацца навеяць\\
казкі-таямніцы\\
Гукамі мелодый,\\
радасцю без слоў.\\
\\
І застылі цені\\
у маёй святліцы,\\
Засынаю… Сніцца\\
роднае сяло.

 


===== Падобныя старонкі =====
  * [[творы/ларыса-геніюш/ларыса-геніюш-на-каньках]]
  * [[творы/кастусь-жук/кастусь-жук-беларуская-зіма]]
  * [[творы/кастусь-жук/кастусь-жук-снежань]]
  * [[творы/змітрок-бядуля/змітрок-бядуля-сняжынкі]]
  * [[ibdc.ped>зімой-у-лесе]]