~~META:
title = Павел Місько — Здрада
&keywords = глядзіць, кошка, сядзіць, дзвярэй, людзей, пусціла, пераходзе, пажыві
&abstract = Верш Паўла Місько "Здрада"
&iftrue = nan
~~

====== Павел Місько — Здрада ======
Метро.\\
Падземны пераход...\\
Каля падсобкі нейчы кот...\\
Не, памыліўся, мабыць, трошкі:\\
Тры колеры – прыкмета кошкі...\\
Даўно, шмат дзён яна сядзіць\\
Каля прачыненых дзвярэй\\
І ўсё прыжмурана глядзіць\\
На ногі тысячаў людзей,\\
Нібы чакае ўсё кагосьці,\\
Нібы ва ўсіх, ва ўсіх пытае:\\
Дзе дзелася жанчына тая,\\
Што да ката насіла «ў госці»?\\
Назад, дадому ж, не занесла,\\
Бо дома, бачыце, так цесна,\\
Пусціла кошку ў пераходзе,\\
Дзе тлуму больш, дзе людзі ходзяць.\\
Сама ж як хвосцікам накрылася,\\
Умомант знікла, растварылася...\\
А кошка тоўстая сядзіць,\\
І на людзей глядзіць, глядзіць,\\
За тварамі людскімі сочыць,\\
Сустрэць жанчыну тую хоча,\\
Каб зазірнуць пытальна ў вочы:\\
«Ну хіба ёсць мая віна,\\
Што скора буду не адна?»\\
\\
З дзвярэй выглядвае кабета:\\
– Ты плюнь, гарушка, на заразу!\\
Во гэткія ў раддоме зразу\\
Зракаюцца і сваіх дзетак.\\
Скарае Бог яе за гэта.\\
Хадзі хоць душу пажыві,\\
Дам хлеба, дам і малачка,\\
А як захочаш – пажыві ,\\
Мо будзеш лепшай, чым дачка,\\
Але нікому ні мур-мур,\\
Што я тут днюю і начую...\\
Акна няма... Бетон, мармур...\\
Труна каменная...\\
Не чую,\\
Што ў пераходзе, хоць з гармат\\
Страляй ці бі ў якія звоны... –\\
Сцягла з сябе камзол-халат,\\
Што быў мо некалі чырвоны,\\
І кошку гэткаю апраткай\\
Захутала, нібы дзіцятка.\\
Як несла – да грудзей туліла,\\
Шаптала штосьці ёй чулліва,\\
А потым і слязу пусціла:\\
– Выгнанніца ж і я таксама...\\
Не трэба дзеткам ужо мама...\\
А заўтра сяду я з табою\\
З працягнутай рукою...

 


===== Падобныя старонкі =====
  * [[творы/павел-місько/павел-місько-навасёлы]]
  * [[творы/павел-місько/павел-місько-грот-афаліны]]
  * [[творы/павел-місько/павел-місько-адарка-і-пацукі]]
  * [[творы/павел-місько/павел-місько-эрпіды-на-планеце-зямля]]
  * [[творы/павел-місько/апавяданні-паўла-місько]]