~~META:
title = Ніна Мацяш — Снегіры
&keywords = снегіры, снег, год
&abstract = Верш Ніны Мацяш "Снегіры"
&iftrue = nan
~~

====== Ніна Мацяш — Снегіры ======
Можа, хто паслухаць хоча,\\
Што я сёння чуў уночы?\\
Сплю сабе… Аж на зары\\
Прыляцелі снегіры.\\
\\
Селі шумнай чарадой,\\
Скардзяцца наперабой:\\
– Ох і падвяла ж зіма!\\
Снегу белага – няма.\\
\\
Снежань мусіць гразь мясіць:\\
Дождж, бы ўвосень, марасіць.\\
Што, як раптам Новы год\\
Адкладзе свой надыход?\\
\\
І рашылі снегіры:\\
– Мы склюём календары!\\
Як у іх лісткоў не будзе,\\
Новы год паклічуць людзі.\\
\\
Хоча ён таго ці не –\\
Прыйдзе з ёлкай на спіне!\\
Можа, снегу прынясе,\\
Густа-густа натрасе.\\
\\
Без яго ж, мяркуйце самі,\\
Як нам звацца снегірамі?\\
Вось пра што ў маім двары\\
Гаманілі снегіры.

 


===== Падобныя старонкі =====
  * [[творы/янка-брыль/птушкі-i-гнёзды-гнёзды-за-дымам-аповесць]]
  * [[творы/янка-брыль/раман-янкі-брыля-птушкі-і-гнёзды-вобраз-]]
  * [[ibdc.ped>птушкі-шчасця]]
  * [[творы/янка-брыль/увесь-свет-адзін-дом-па-раману-янкі-брыл]]
  * [[творы/янка-брыль/птушкі-i-гнёзды-сцюдзёны-вырай-аповесць-]]