~~META:
title = Ніна Мацяш — Жыла-была рака
&keywords = Мацяш, жыла, была, рака
&abstract = Чытаць верш Ніны Мацяш "Жыла-была рака"
&iftrue = nan
~~

====== Ніна Мацяш — Жыла-была рака ======
«Не адгаворвайце, — рака прасіла\\
Сваіх разумных, асцярожных сёстраў. —\\
Я маю знаць, што там, за гэтым лесам.\\
Я толькі пагляджу і зноў вярнуся».\\
\\
А за дубровай стэп ляжаў асмяглы,\\
Любімы толькі кавылём ды ветрам.\\
І рэчка-неўгамонка навучыла\\
Яго, бясплоднага, сады разводзіць.\\
\\
«Малю, застанься тут! Навек пашана\\
І слава з тваім імем будзе зліта».\\
«Даруйце... Але ж мне мусова трэба\\
Даведацца, што там,за той гарою...» —\\
Шапнула рэчка стэпу вінавата.\\
\\
Быў шлях яе і доўгі, і нялёгкі.\\
Нарэшце стаў лавіць напяты слых\\
Якісьці невыразны, невыказны,\\
Як мара неакрэсленая, пошум.\\
Забілася няроўна, гулка сэрца\\
У шчасным прадчуванні адкрыцця.\\
\\
Ды трэба ж!\\
Паслізнулася рачулка\\
На шэрай, абыякавай скале\\
І ўніз — грудзьмі ў бяздоннае правалле!..\\
I, падаючы, шчэ вярнуць паспела\\
Замоўленай сівой цясніне мову.\\
Іна ляту ўжо ўчула шчэ пра мора,\\
І мільганула яснае: «Дайсці б!..»\\
\\
Жыла-была рака...\\
Жыві, рака!

 


===== Падобныя старонкі =====
  * [[творы/эдзі-агняцвет/эдзі-агняцвет-рэчка-рэчанька-мая]]
  * [[творы/сяргей-грахоўскі/сяргей-грахоўскі-пачатак]]
  * [[творы/якуб-колас/якуб-колас-каля-рэчкі]]
  * [[творы/анатоль-грачанікаў/анатоль-грачанікаў-шарпілаўка-цячэ-ў-жыц]]
  * [[ibdc.ped>нёман]]