~~META:
title = Ніна Мацяш — Была такая буйная вясна...
&keywords = жыла, вясна
&abstract = Чытаць верш Ніны Мацяш "Была такая буйная вясна..."
&iftrue = nan
~~

====== Ніна Мацяш — Была такая буйная вясна... ======
Была такая буйная вясна!\\
А я жыла, жыла – не разумела,\\
Нашто мяне абдорвала яна\\
Цнатлівай чысцінёй чаромхі белай,\\
Яе агрузлых, хмельных кутасоў\\
Таемнай, ледзь улоўнаю гаркотай.\\
На ўзлесках цвіў лілова-сіні сон\\
I аддаваў мне ўсю сваю пяшчоту.\\
А салаўі, пад смех маладзіка,\\
Паілі сэрца слодыччу шчымлівай.\\
Прымала ўсе дары мая рука\\
Ў няведанні наіўным і шчаслівым.\\
\\
Цяпер дажджы дзяўбуць маё акно,\\
Шматае вецер з дрэў рудое лісце.\\
...Дзень добры, любы! Ведаю даўно,\\
Нашто вясна дарункамі калісьці\\
Абсыпала мяне так шчодра...\\
\\
1963\\


\\
Крыніца: Ніна Мацяш. Душою з небам гаварыць: Выбраная лірыка. – Мн.: Маст. літ., 1999. – 462 с. – (Беларуская паэзія XX стагоддзя).

 


===== Падобныя старонкі =====
  * [[творы/ніна-мацяш/ніна-мацяш-запозненаю-дзікаю-ажынай]]
  * [[творы/ніна-мацяш/ніна-мацяш-бязладная-размова]]
  * [[творы/ніна-мацяш/ніна-мацяш-незалежнасць]]
  * [[творы/ніна-мацяш/ніна-мацяш-дажджынка]]
  * [[творы/ніна-мацяш/творчасць-ніны-мацяш]]