~~META:
title = Ніна Мацяш — А ты жыві, каханы мой, жыві...
&keywords = жыві, каханы, харашыні, свеце, светла, жыццё
&abstract = Чытаць верш Ніны Мацяш "А ты жыві, каханы мой, жыві..."
&iftrue = nan
~~

====== Ніна Мацяш — А ты жыві, каханы мой, жыві... ======
А ты жыві, каханы мой, жыві.\\
Хай журавель нарэшце дасца ў рукі.\\
Я забяру ў магілу тыя мукі,\\
Што выпалі нам на кастры любві.\\
Ад золі сэрцайка сваё адхукай:

Жыві, каханы мой, жыві!

\\
На свеце гэтым шмат харашыні.\\
Хоць людзі ў свеце гэтым – тое голле,\\
Па-над якім вятрам бяды скуголіць\\
Усцяж, і ноч у ноч, і дзень пры дні.\\
Ці чалавек задуманы для болю?

Як ён жадзён харашыні!..

\\
Не пасягнуць мне розумам маім\\
Тваіх намераў велічных, Прырода.\\
Жыццё дала – не папытала згоды.\\
Усе цацанкі-абяцанкі – дым.\\
Жыццё бярэш, – і мне зусім не шкода

Аднойчы развітацца з ім.

\\
Бо што мяне прызеляніла тут?\\
Якая ўжо мяне чакае радасць,\\
Як дружны род мой расхітала здрада,\\
Як дзецьмі не ацеплены мой кут,\\
Як песенны мой дар не мае ўлады

I над драбнейшаю са смут?..

\\
А ты жыві, каханы мой, жыві.\\
Хай сэрцу будзе да каго хіліцца.\\
Хай жураўлём абернецца сініца.\\
Сваю шчаслівай долю назаві.\\
Хай светла збудзецца, што светла сніцца, –

Жыві, каханы мой, жыві!

\\
1985\\


\\
Крыніца: Мацяш Н. Паміж усмешкай і слязой: вершы і паэмы 1962-1992. – Мн.: Маст. літ., 1993. – 301 с.

 


===== Падобныя старонкі =====
  * [[творы/ніна-мацяш/ніна-мацяш-дажджынка]]
  * [[творы/ніна-мацяш/ніна-мацяш-бязладная-размова]]
  * [[творы/ніна-мацяш/творчасць-ніны-мацяш]]
  * [[творы/ніна-мацяш/ніна-мацяш-запозненаю-дзікаю-ажынай]]
  * [[творы/ніна-мацяш/ніна-мацяш-незалежнасць]]