~~META:
title = Ніл Гілевіч — Паклон табе ад сэрца, мама...
&keywords = дзеці, мама, сцяпан, дзяцей, радзімы, вечны, круг
&abstract = Урывак з рамана ў вершах «Родныя дзеці» (з раздзела «Пашанаванне»)
&iftrue = nan
~~

====== Ніл Гілевіч — Паклон табе ад сэрца, мама... ======
– Паклон табе ад сэрца, мама, –\\
Пачаў няголасна Сцяпан. –\\
Ты без хлусні і без абмана\\
Трымала наш сямейны стан.\\
\\
Даверам нас, дзяцей, расціла,\\
Бо знала ты, што й цэлы свет –\\
Адно дамовіўшыся шчыра –\\
Пазбыцца зможа страшных бед.\\
\\
І не чытаўшы мудрых кніжак,\\
Спасцігла ісціну сама:\\
Няма Радзімы ў злыдняў хіжых\\
І Маці ў нелюдзяў – няма.\\
\\
Мы – тройчы дзеці ў вечным крузе:\\
Мы – дзеці роднае сям'і,\\
І – дзеці Маці-Беларусі,\\
І – дзеці Матухны-Зямлі.\\
\\
Трайны ён, круг, ды недзялімы:\\
Бо сёння – як ні паглядзім –\\
А лёс Дзяцей, і лёс Радзімы,\\
І лёс Планеты – лёс адзін.\\
\\
І ўсе мы разам у адказе\\
За гэты вечны круг жыцця.\\
Хвала ж таму, хто ў трудным часе\\
Без мітусні і без ныцця\\
\\
Сваё праходзіць... Так, як мама, –\\
Сцяпан праз паузу дадаў.\\
Абняў старую ўсхвалявана\\
І рукі ёй пацалаваў.

 


===== Падобныя старонкі =====
  * [[ibdc.ped>ганарымся-бацькаўшчынай]]
  * [[творы/алесь-разанаў/алесь-разанаў-радзіма]]
  * [[творы/янка-купала/тэма-народнага-жыцця-і-любоў-да-радзімы-]]
  * [[творы/алесь-бачыла/алесь-бачыла-радзіма-мая-дарагая]]
  * [[ibdc.ped>скарбы-нашай-радзімы]]