~~META:
title = Ніл Гілевіч — Замірае...
&keywords = замірае
&abstract = Чытаць верш "Замірае..." Ніла Гілевіча
&iftrue = nan
~~

====== Ніл Гілевіч — Замірае... ======
Замірае,\\
Сціхае\\
Мая залатая дуброва,\\
Асыпае,\\
Скідае на дол\\
Свой задумлівы ўбор.\\
Не звініць і не льецца\\
Раздольна-вячыстая мова,\\
Толькі шорхат сухі пад нагамі,\\
Як скарга-дакор.\\
А нядаўна ж яшчэ —\\
На пачатку нядоўгага лета —\\
Што рабілася тут,\\
Што за дзіўнае свята было!\\
Як усё бушавала,\\
Буяла лістотай і цветам,\\
Як усё гаманіла,\\
Спявала,\\
Гукала,\\
Гуло!\\
Колькі радасці чулася\\
Ў кожным разбуджаным гуку!\\
Колькі сілы ўкладалася\\
Ў сокат\\
І строкат,\\
І свіст!\\
Кожны парастак прагнуў\\
Узвысіцца дрэвам магутным,\\
Кожны лісцік хацеў\\
Разрасціся ў агромністы ліст.\\
Дзе ж падзелася ўсё,\\
Што заместа вячыстага слова\\
Толькі шорхат сухі пад нагамі\\
Як скарга-дакор?..\\
Замірае,\\
Сціхае\\
Мая залатая дуброва,\\
Асыпае,\\
Скідае на дол\\
Свой задумлівы ўбор.\\
\\
\\
1966

 


===== Падобныя старонкі =====
  * [[творы/ніл-гілевіч/матывы-і-вобразы-паэзіі-ніла-гілевіча]]
  * [[творы/ніл-гілевіч/ніл-гілевіч-лодачкі]]
  * [[постаці/ніл-гілевіч]]
  * [[творы/ніл-гілевіч/грамадзянская-і-медытатыўная-лірыка-ніла]]
  * [[творы/ніл-гілевіч/ніл-гілевіч-родныя-дзеці-гдз]]