~~META:
title = Ніл Гілевіч — Думы маці
&keywords = рукі, ціха, свеце, клопат, маці
&abstract = Чытаць верш Ніла Гілевіча "Думы маці"
&iftrue = nan
~~

====== Ніл Гілевіч — Думы маці ======
Вечар сіньку развёў за акном.\\
Змрок згушчаецца ў хаце.\\
У самотнай цішы перад сном\\
Думы думае маці.\\
\\
Замарылася... Цяжка старой\\
Тупаць дзень каля дому.\\
Час вяртае без літасці ёй\\
Нават даўнюю стому.\\
\\
Загарнуўшы ў абрус на стале\\
Свежы бохан пачаты,\\
Склала рукі яна ў прыпале –\\
На пярэднік шурпаты.\\
\\
Рукі пахнуць травой-лебядой,\\
Сырадоем і ўкропам.\\
Гэтых пахаў ніякай вадой\\
Не адмыеш ні троху.\\
\\
Колькі год рукі зналі адно:\\
Жалі, цеста мясілі,\\
Бульбу чысцілі, ткалі радно,\\
Цыравалі ды шылі.\\
\\
Колькі раз яны ўдзень і ўначы\\
Немаўлят спавівалі!\\
Колькі раз – хіба хто палічыў? –\\
Гэты стол накрывалі!..\\
\\
Клопат, клопат нязводны штодня!\\
А прарочылі людзі:\\
"Пачакай, падрасце малышня –\\
Болей клопату будзе!"\\
\\
Гаварылі-такі нездарма:\\
Супакойней не стала.\\
Як глядзела тады іх сама –\\
Столькі скрухі не знала.\\
\\
Вестка ўчора ад сына прыйшла:\\
Нарадзілася ўнучка.\\
А ці добра ж усё? Каб магла –\\
Паляцела б, як птушка.\\
\\
Меншы з арміі піша ў лісце,\\
Што чакае дарога.\\
А куды – не сказаў. І расце,\\
Кроіць сэрца трывога.\\
\\
І дачка ўжо нявеста даўно,\\
Позна з танцаў прыходзіць.\\
Хоць дарослая, а ўсё адно\\
Накрычаць не пашкодзіць...\\
\\
Думы-думкі!..\\
У лад ім, чуваць,\\
Клён ля ганку шапоча.\\
Нібы ў памяць, у заўтра глядзяць\\
Маці стомленай вочы.\\
\\
Гора ў бездань нябыту сплыло.\\
Доляй цешацца дзеці.\\
Толькі б ціха на свеце было,\\
Толькі б ціха на свеце...\\
\\
1961\\


\\
Крыніца: Ніл Гілевіч. Збор твораў у 23-х тамах. Т. 1. – Прадмова аўтара – Мн.: ГА БТ «Кніга», 2003. – 416 с.

 


===== Падобныя старонкі =====
  * [[ibdc.ped>на-скрыжаванні]]
  * [[ibdc.ped>сустрэча-з-маці]]
  * [[ibdc.ped>да-маці]]
  * [[творы/янка-золак/янка-золак-ода-маці]]
  * [[ibdc.ped>i-надыходзіць-дзень]]