~~META:
title = Ніл Гілевіч — Верабей
&keywords = гора, скача, чырык
&abstract = Чытаць верш Ніла Гілевіча "Верабей"
&iftrue = nan
~~

====== Ніл Гілевіч — Верабей ======
Холад цісне ўсё мацней,\\
Стынуць дрэвы ў шэрані.\\
Прабірае да касцей\\
Верабейку шэрага.\\
\\
Скача, скача па двары,\\
Пырхае, чырыкае.\\
Гора, што ні гавары,\\
Гора дый вялікае.\\
\\
Абляцеў усё сяло,\\
Гумны ўсе і сметнікі, –\\
Ні крупінкі, як назло,\\
Не разжыўся, бедненькі.\\
\\
Ох і цяжкая зіма\\
З лютай сцюжай гэткаю!\\
Сеў бядак і задрамаў\\
Пад старой паветкаю.\\
\\
І сасніў, нібыта зноў\\
Свеціць сонца весняе,\\
А яды – на сто гадоў\\
У запас нанесена!\\
\\
Прахапіўся верабей,\\
Зірк: ажно за студняю,\\
У кармушцы, на вярбе,\\
Снегіры палуднуюць!\\
\\
Ён туды – чырык! чырык!\\
Узляцеў на дошчачкі:\\
– Расступіцеся, сябры!\\
Дайце мне хоць трошачкі!

 


===== Падобныя старонкі =====
  * [[творы/ніл-гілевіч/матывы-і-вобразы-паэзіі-ніла-гілевіча]]
  * [[творы/ніл-гілевіч/грамадзянская-і-медытатыўная-лірыка-ніла]]
  * [[постаці/ніл-гілевіч]]
  * [[творы/ніл-гілевіч/ніл-гілевіч-лодачкі]]
  * [[творы/ніл-гілевіч/ніл-гілевіч-родныя-дзеці-гдз]]