~~META:
title = Ніл Гілевіч — Бальшак
&keywords = бальшак
&abstract = Чытаць верш "Бальшак" Ніла Гілевіча
&iftrue = nan
~~

====== Ніл Гілевіч — Бальшак ======
Праз долы-нізоўі, дзе ўвечар туманы ўстаюць,\\
Праз водар мядункавы спелых лугоў у пракосах,\\
Праз рэкі і рэчкі, што петлі блакітныя ўюць,\\
Праз ранішні гоман стозыкі пасёлкаў і вёсак,\\
Праз пушчу, дзе сосны струменяць жывіцу-пяршак,\\
Праз ліўні густыя, што раптам заслоняць паўсвета, —\\
Спяшаецца ўдалеч стары беларускі бальшак.\\
Спяшаюцца людзі. Спяшаецца век-непаседа.\\
\\
Мільгаюць бярозы — астаткі даўнейшых прысад\\
Гіганцкімі скрыпкамі воддаль — слупы з правадамі...\\
Імчуся і думаю: колькі стагоддзяў назад\\
Тут прашчуры босыя сцежку сабе пракладалі:\\
І колькі стагоддзяў тут гора хадзіла пасля,\\
Мужычую помсту хавала пад цёмныя шаты?..\\
І колькі разоў тут пляліся чужынцы здаля,\\
Губляючы гонар і славу, штандары і шапкі?..\\
\\
Нібы ўпершыню, углядаюся зноў у прастор —\\
У мілыя, родныя вобразы любага краю.\\
Без гэтых бароў задуменных, без гэтых азёр,\\
Без гэтых палеткаў я шчасця на свеце не знаю.\\
Вядзі ж мяне ўдалеч — за ўсе гарызонты, бальшак!\\
Праз будні імчы і праз святы,\\
Праз дні і праз ночы —\\
Каб вецер Радзімы гудзеў несціхана ў вушах,\\
Каб дых захліпаўся, каб слёзы ўзбягалі на вочы!\\
\\
\\
1964

 


===== Падобныя старонкі =====
  * [[творы/ніл-гілевіч/ніл-гілевіч-родныя-дзеці-гдз]]
  * [[творы/ніл-гілевіч/грамадзянская-і-медытатыўная-лірыка-ніла]]
  * [[творы/ніл-гілевіч/матывы-і-вобразы-паэзіі-ніла-гілевіча]]
  * [[постаці/ніл-гілевіч]]
  * [[творы/ніл-гілевіч/ніл-гілевіч-лодачкі]]