~~META:
title = Ніл Гілевіч — Асвенцім
&keywords = міліёны
&abstract = Чытаць санет Ніла Гілевіча "Асвенцім"
&iftrue = nan
~~

====== Ніл Гілевіч — Асвенцім ======
«Нас тут было чатыры міліёны!» –\\
Крычыць жахлівы надпіс са сцяны.\\
«Усім, усім падпальшчыкам вайны\\
На ўсе вякі мы шлём свае праклёны!\\
\\
Нас з’еў агонь – чатыры міліёны\\
Мужчын, жанчын, дарослых і дзяцей.\\
Скажыце: дымам з вогнішча касцей\\
Сягоння свет ужо не заімглёны?\\
\\
Скажыце – мёртвыя, мы хочам знаць:\\
З жаночых кос, як таннай сыравіны,\\
Ужо не ткуць сягоння мешкавіны\\
І дываноў, каб ногі выціраць?\\
\\
А каб мільёнамі не паміраць –\\
Вы знаеце, што вы рабіць павінны?»\\
\\
1964-1965 гг.

 


===== Падобныя старонкі =====
  * [[творы/максім-багдановіч/максім-багдановіч-санет-паміж-пяскоў-егі]]
  * [[творы/янка-купала/янка-купала-для-зямлі-прадзедаў-маіх]]
  * [[творы/максім-багдановіч/максім-багдановіч-санет-замёрзла-ноччу-ш]]
  * [[слоўнік/санет]]
  * [[слоўнік/вянок-санетаў]]