~~META:
title = Міхась Чарот — Вясну пяю
&keywords = сонца
&abstract = Чытаць верш "Вясну пяю" Міхася Чарота
&iftrue = nan
~~

====== Міхась Чарот — Вясну пяю ======
Зямлю цалуе неба сінь\\
Сваім чырвоным сонцатварам,\\
I песню ночы «ква-кум-бінь»\\
Пяюць мне сонныя выгары.\\
\\
У высі зорак сенажаць\\
Вартуе месяц — дзед двухрогі,\\
Не хоча раніцу спаткаць\\
I лесам хмар ідзе, бязногі.\\
\\
Капліца белая, як здань,\\
Ў тумане плавае за вёскай,\\
I сонцам спуджаная рань\\
Прысела зайцам за бярозкай.\\
\\
Дзянніцы зірк на небе стух,\\
Вясковых хат дымяць галовы,\\
У лапцях з пугаю пастух\\
Трубою плача на каровы.\\
\\
Пяе у полі хор калёс,\\
Як старац з ліраю разбітай...\\
Загоны вузкія авёс\\
Убраў зялёным аксамітам.\\
\\
Вясёлы птушак перазвон\\
Гудзе на воблачнай званіцы...\\
Бязмоўнай цішы гіне сон,\\
Як сонца выплыве крыніцай.\\
\\
I сыпле промень вогнесталь,\\
К вачам схілю сярпом далонь я\\
I пазіраю моўчкі ўдаль,\\
У шыр блакітнага бяздоння.\\
\\
1922

 


===== Падобныя старонкі =====
  * [[творы/міхась-чарот/міхась-чарот-босыя-на-вогнішчы]]
  * [[постаці/міхась-чарот]]
  * [[творы/міхась-чарот/міхась-чарот-песня-беларуса]]
  * [[творы/міхась-чарот/міхась-чарот-вясенняя-раніца]]
  * [[творы/міхась-чарот/міхась-чарот-звон]]