~~META:
title = Міхась Чарот — Вясенняя раніца
&keywords = сонца, вясна
&abstract = Чытаць верш Міхася Чарота "Вясенняя раніца"
&iftrue = nan
~~

====== Міхась Чарот — Вясенняя раніца ======
Гляньце, дзеткі, у аконца,\\
Ды пара ужо ўставаць.\\
Як прыгожа там бясконца.\\
Сорам, дзеткі, позна спаць!\\
\\
Заглянула сонца ў вочкі,\\
Дзень прыйшоў — даволі сну.\\
На свет гляньце, галубочкі,\\
Ўсе вітаюць там вясну.\\
\\
Пчолкі выпаўзлі з калоды,\\
Пачалі збіраць мядок,\\
Шпак вартуе агароды\\
I вішнёвы наш садок.\\
\\
Зелянее траўка ў полі.\\
Ў небе птушачкі пяюць.\\
Эх! Зімы не будзе болей,\\
Хутка кветкі зацвітуць.\\
\\
Вы зірніце у аконца,\\
Палюбуйцеся хаця:\\
Колькі волі, колькі сонца,\\
Колькі новага жыцця!\\
\\
Ўстаньце, дзеткі, пойдзем ў поле\\
Спевы слухаць, кветкі рваць.\\
Ў хаце сумна, бы ў няволі…\\
Ўстаньце дзеткі, годзе спаць!

 


===== Падобныя старонкі =====
  * [[творы/міхась-чарот/міхась-чарот-моладзь]]
  * [[творы/міхась-чарот/міхась-чарот-звон]]
  * [[постаці/міхась-чарот]]
  * [[творы/міхась-чарот/міхась-чарот-песня-беларуса]]
  * [[творы/міхась-чарот/міхась-чарот-босыя-на-вогнішчы]]