~~META:
title = Міхась Кавыль — Ідзі, ідзі...
&keywords = ідзі, эдэльвейс
&abstract = Чытаць верш Міхася Кавыля "Ідзі, ідзі..."
&iftrue = nan
~~

====== Міхась Кавыль — Ідзі, ідзі... ======
Упала ноч.

Як эдэльвейсы, зоры

Цвітуць над Альпамі.

Аскепак-маладзік

У неба ўрэзаўся.

Блакітнае на горы

Імжыць святло.

А ты ідзі, ідзі...

Якая ноч!

Як у святыні, ціха

I урачыста.

На калені упадзі.

Вунь там агонь міргае...

Шчасце з ліхам

Кладуцца спаць...

А ты ідзі, ідзі...

Трывожыць ноч,

як смерці жах мінулы,

I прышласць мроіцца,

як недабіты дзік.

Нібы агонь,

няўсподзеў шуганула

Жаданне жыць.

Каб жыць,

ідзі, ідзі...

Канае ноч,

і зазвінелі зоры.

Прамень, як штых, бліснуў,

I маладзік

Збляднеў,

самлеў.

Ружовае на горы

імжыць святло.

А ты ідзі, ідзі...

\\
\\
1944-1952

 


===== Падобныя старонкі =====
  * [[творы/міхась-кавыль/міхась-кавыль-сібір]]
  * [[творы/міхась-кавыль/міхась-кавыль-просьба]]
  * [[творы/міхась-кавыль/жыццёвы-і-творчы-шлях-міхася-кавыля]]
  * [[постаці/міхась-кавыль]]
  * [[творы/міхась-кавыль/міхась-кавыль-санет]]