~~META:
title = Міхась Кавыль — Трыялеты
&keywords = тугі, купіш, падслухаў, крылле, сумнай, зарок, апошні, песні, весялосцю, улюбенец, крыніцы, багінь, трыялет, урэзаць
&abstract = Чытаць "Трыялеты" Міхася Кавыля
&iftrue = nan
~~

====== Міхась Кавыль — Трыялеты ======
**1**

Я падслухаў цябе ля крыніцы,\\
Улюбенец багінь трыялет.\\
Прыгажосці тваёй таямніцы\\
У сінявым трызвоне зарніцы,\\
Што у срэбныя хвалі глядзіцца\\
Там, дзе сумны схіліўся паэт.\\
Я падслухаў цябе ля крыніцы,\\
Улюбенец багінь трыялет.\\


**2**

Апошні раз даю зарок\\
Урэзаць песні сумнай крылле.\\
Яна, змагарнасці парок,\\
Збівае з рытму войны крок:\\
Аб ёй сказаў якісь прарок:\\
Яе узвышша – замагілле.\\
Апошні раз даю зарок\\
Урэзаць песні сумнай крылле.\\


**3**

«Не было і няма весялосці...»\\


Ул. Дудзіцкі

“Не было і няма ...” I не трэба.\\
Весялосцю не купіш тугі.\\
На абрусе блакітнага неба\\
Ёсць акраец няспытаны хлеба,\\
Найвялікшая сэрца патрэба\\
На аблоні, дзе вецер тугі...\\
Не было і няма... I не трэба.\\
Весялосцю не купіш тугі.\\
\\
Жнівень 1956

 


===== Падобныя старонкі =====
  * [[творы/еўдакія-лось/еўдакія-лось-трыялет]]
  * [[творы/данута-бічэль-загнетава/данута-бічэль-загнетава-не-называй-мяне-]]
  * [[слоўнік/трыялет]]
  * [[творы/рыгор-барадулін/рыгор-барадулін-юнацтва-светлая-часіна]]
  * [[творы/эдуард-акулін/эдуард-акулін-трыялет]]