~~META:
title = Міхась Кавыль — Крытыку
&keywords = вершы, крытык
&abstract = Чытаць верш Міхася Кавыля "Крытыку"
&iftrue = nan
~~

====== Міхась Кавыль — Крытыку ======
Словы вершу, што глыбы граніту,\\
У нямым спачываюць бяздонні.\\
Не падняць іх агнём дынаміту,\\
Калі ў сэрцы зара не зазвоніць.\\
\\
Вершы, вершы, паэта малітвы\\
На жыцця нясуцешнай аблоні!\\
Вы як слёзы, што воін уроніць\\
Пасля цяжкай спраможнае бітвы.\\
\\
У пустэльні спякотнай крыніца.\\
Перад тым, як бальзаму напіцца,\\
Меч хавае разбойнік у ножны.\\
\\
Толькі ты, самасвечаны крытык,\\
Не па сану імсцівы, сярдзіты,\\
Хрысціш лоб, блудасловіш бязбожна.\\
\\
1955

 


===== Падобныя старонкі =====
  * [[творы/максім-багдановіч/максім-багдановіч-санет-паміж-пяскоў-егі]]
  * [[слоўнік/вянок-санетаў]]
  * [[творы/янка-купала/янка-купала-для-зямлі-прадзедаў-маіх]]
  * [[творы/максім-багдановіч/максім-багдановіч-санет-замёрзла-ноччу-ш]]
  * [[слоўнік/санет]]