~~META:
title = Міхась Кавыль — Кастусь Каліноўскі
&keywords = грудзях, кастусь, сэрца, жыцця, каліноўскага, пятля, вочы, сэрцы, думаю
&abstract = Чытаць верш Міхася Кавыля "Кастусь Каліноўскі"
&iftrue = nan
~~

====== Міхась Кавыль — Кастусь Каліноўскі ======
Калі я думаю аб ім,

думаю аб сэрцы,

Найбольшым сэрцы на зямлі,

непадуладным смерці.

Яго не здужала пятля

ката-Мураўёва,

Яно рытмуе у грудзях

песняю баёвай;

Пяе у грудзях у маіх,

у тваіх грукоча

Няўтольнай спрагаю жыцця

светлага, як вочы...

Як вочы любае дачкі,

сына дарагога,

Каму не сніцца эшафот,

дальняя дарога...

Жыцця між сініх васількоў –

не з мярэжнай казкі –

Жыцця без кратаў, ланцугоў,

без чужацкай ласкі.

Вялікім, зыркім тым вагнём

непагасна, смела

Каліноўскага праз век

сэрца палымнела:

“Мужыцкай праўдай’’ у душы

дзірваны арала,

Праз пушчы помстаю ішло

са склютам, самапалам...

Шляхоцкі сын, Кастусь не знаў

злыбяды, патолі,

А сэрца плакала яго

бліжняга нядоляй.

Малілі Бога за яго

бедныя матулі.

Хрыстапрадаўцы прадалі...

У Маскве ўздыхнулі.

Уздыхнулі рана – жыў Кастусь...

У Вільні, на памосце,

Не Каліноўскага – прыблуд

хруснулі пся-косці.

Касою голаў сцяла смерць...

А пятля на шыі

Вязала цесны вузел тым,

што яго душылі...

I хай не сквапіцца Масква

нас зрадніць з Тунгусам –

Бунтуе сэрца Кастуся

ў грудзях Беларуса...\\
\\
13. II. 1963

 


===== Падобныя старонкі =====
  * [[постаці/кастусь-каліноўскі]]
  * [[творы/васіль-зуёнак/васіль-зуёнак-развітанне-каліноўскага]]
  * [[творы/станіслаў-шушкевіч/станіслаў-шушкевіч-хай-літва-і-беларусь-]]
  * [[ibdc.ped>нявеста-каліноўскага]]
  * [[творы/іншае/кастусь-каліноўскі-мужыцкая-праўда]]