~~META:
title = Мікола Чарняўскі — Чарадзейныя пруткі
&keywords = пруткі, бабуліных, руках, ўрок
&abstract = Чытаць верш Міколы Чарняўскага "Чарадзейныя пруткі"
&iftrue = nan
~~

====== Мікола Чарняўскі — Чарадзейныя пруткі ======
У руках бабуліных пруткі –\\
Бліскавіц дзівоснае мільганне.\\
А клубкі,\\
Нібыта калабкі,\\
Тупаюць па кошыку\\
Ад рання.\\
\\
Паслухмяныя яе рукам\\
І пруткам, –\\
Спачынку не чакаюць:\\
І няўседна вёрткім калабкам,\\
Пагуляюць,\\
А пасля –\\
Знікаюць.\\
\\
У руках бабуліных пруткі,\\
Не пруткі –\\
Жывыя хабаткі:\\
Кожны рух –\\
Завучаны, бы ўрок.\\
І чаго, чароўныя, не зробяць?!\\
Звяжуць рукавічкі,\\
Світэрок\\
І сукенку, –\\
Ў іх умення хопіць!\\
\\
І на што ні глянуць –\\
Свой узор,\\
Колераў дзівосная вясёлка:\\
То ў нябёс узятых,\\
То – у зор,\\
То ў лугоў надрэчных,\\
То – у золкаў.\\
У руках бабуліных пруткі.\\
Хіба прапушчу я ўрок такі?\\
\\
Я падсела бліжай да яе.\\
Я гатова,\\
Як яна, старацца.\\
Дай, бабуля, мне\\
Пруткі свае,\\
Навучы, як з імі\\
Мне ўпраўляцца.\\
\\
Я не кіну іх,\\
Не засмучу –\\
З імі, як і ты,\\
Дружыць хачу!

 


===== Падобныя старонкі =====
  * [[творы/мікола-чарняўскі/мікола-чарняўскі-ёлка]]
  * [[творы/мікола-чарняўскі/мікола-чарняўскі-акадэмія-на-колах]]
  * [[творы/міхась-чарняўскі/міхась-чарняўскі-вогнепаклоннікі]]
  * [[творы/мікола-чарняўскі/мікола-чарняўскі-вясёлка-над-полем]]
  * [[творы/мікола-чарняўскі/мікола-чарняўскі-змайстравалі-сані]]