~~META:
title = Мікола Чарняўскі — Урок ветлівасці
&keywords = ўрок, кніжку, ўроку, дзяўчынак, зінка
&abstract = Чытаць верш Міколы Чарняўскага "Урок ветлівасці"
&iftrue = nan
~~

====== Мікола Чарняўскі — Урок ветлівасці ======
Дзяўчынак хлопцы\\
Не чапаюць,\\
За косы нават\\
Не скубнуць.\\
Папросяць кніжку –\\
І чакаюць,\\
Пакуль ім кніжку\\
Пададуць.\\
\\
Як імянінніцы,\\
Дзяўчынкі,\\
Ажно цвітуць:\\
Прыемна ім –\\
Наш класны стараста\\
Навінку\\
Прыдумаў простую зусім:\\
Быць паслухмянымі,\\
Дзяўчынак\\
Не крыўдзіць болей\\
Анідзе!\\
Ці будзе ўрок,\\
Ці перапынак,–\\
Трымацца ветліва\\
Ўвесь дзень!\\
\\
Куды падзеўся\\
Вечкаў ляскат?\\
Дзе лішні ўзбуджаны шумок?\\
На ўроку:\\
– Дзякуй!..\\
– Калі ласка!..\\
На ўроку –\\
Ветлівасці ўрок.\\
\\
А на бліжэйшым перапынку\\
Да Генкі –\\
Згодзіцца ці не? –\\
Як змоўшчыца,\\
Падсела Зінка:\\
– Памый анучку\\
За мяне...\\
Ды адмахнуўся\\
Злосна Генка:\\
– Сама памыеш,\\
Не паненка!\\
\\
І Зінка,\\
Глянуўшы звысоку,\\
Спытала ўсё ж:\\
– Забыў няўжо?\\
Ты што казаў\\
На тым уроку?..\\
– А ўрок... Урок

мінуў ужо...

 


===== Падобныя старонкі =====
  * [[творы/міхась-чарняўскі/міхась-чарняўскі-вогнепаклоннікі]]
  * [[творы/мікола-чарняўскі/мікола-чарняўскі-акадэмія-на-колах]]
  * [[творы/мікола-чарняўскі/мікола-чарняўскі-змайстравалі-сані]]
  * [[творы/мікола-чарняўскі/мікола-чарняўскі-ёлка]]
  * [[творы/мікола-чарняўскі/мікола-чарняўскі-вясёлка-над-полем]]