~~META:
title = Мікола Чарняўскі — Прыгоды з коскаю
&keywords = коска, сшытку, козка, шукала, словы, блукала, пакінуў, ганебна
&abstract = Чытаць верш Міколы Чарняўскага "Прыгоды з коскаю"
&iftrue = nan
~~

====== Мікола Чарняўскі — Прыгоды з коскаю ======
Спяшаўся Мікітка\\
І быццам для кпінаў\\
Ён лішнюю Коску\\
У сшытку\\
Пакінуў.\\
Дзень Коска, як козка,\\
Па сшытку блукала:\\
Пакутніца Коска\\
Прыпынку шукала.\\
Куды ні прыстане,\\
Капрызныя Словы –\\
Без слоў\\
Кухталёў\\
Ёй падсыпаць гатовы.\\
Адны лямантуюць:\\
"Што стала са сказам?\\
Нашто нас разбіла?\\
Ты ж бачыш –\\
Мы разам!"\\
Другія аж плачуць,\\
Угледзеўшы зваду:\\
"Нашто нас змяшала?\\
Ні ладу,\\
Ні складу!"\\
А трэція хорам:\\
"Ганебна! Ганебна!\\
Хіба ты да месца,\\
Хіба тут патрэбна?.."\\
Ноч Коска, як козка,\\
Па сшытку блукала:\\
Знямоглая Коска\\
Прыстанку шукала.\\
Крыўдлівыя Словы\\
Шумелі, як хвалі,\\
Пагарды,\\
Спагады\\
Сваёй не хавалі:\\
"Па сшытку бадзяцца\\
З такой пагалоскай\\
Не сорам табе,\\
Памаўзлівая Коска?\\
Хто гэты нягоднік?\\
Хто згубнай рукою\\
Пакінуў цябе тут\\
Няшчаснай такою?.."\\
\\
Тулялася Коска,\\
Як козка,\\
Па вёсках,\\
Надумала ўраз\\
Беспрытульная Коска:\\
"Зраблюся двукоссем,\\
Схаваюся ў сшытку,\\
Хай сорамна будзе\\
Не мне, а – Мікітку!"

 


===== Падобныя старонкі =====
  * [[творы/міхась-чарняўскі/міхась-чарняўскі-вогнепаклоннікі]]
  * [[творы/мікола-чарняўскі/мікола-чарняўскі-вясёлка-над-полем]]
  * [[творы/мікола-чарняўскі/мікола-чарняўскі-змайстравалі-сані]]
  * [[творы/мікола-чарняўскі/мікола-чарняўскі-ёлка]]
  * [[творы/мікола-чарняўскі/мікола-чарняўскі-акадэмія-на-колах]]