~~META:
title = Мікола Чарняўскі — Майстры
&keywords = дзед, саша, хопіць, суботы
&abstract = Верш Міколы Чарняўскага "Майстры"
&iftrue = nan
~~

====== Мікола Чарняўскі — Майстры ======
Дзед заняты, дзед майструе,\\
Чутны шоргат, стук.\\
Саша побач з ім шчыруе –\\
Памагае ўнук.\\
\\
Ён стружком кару здзірае,\\
Завіхацца рад.\\
Хоць з ім струг\\
І дзед трымае,\\
Але ўнучак – хват!\\
\\
Дзед сур’ёзны і паважны,\\
Кажа голасна, працяжна:\\
– Тут жа ў нас р-а-бо-ты! –\\
Хопіць да суботы!\\
\\
Хлопчык радасна смяецца:\\
– Дзедка,\\
Што яшчэ?..\\
За нажоўку\\
Дзед бярэцца,\\
Дошку валачэ.\\
\\
Задаволеныя, моўчкі\\
Шоргаюць пілой.\\
Пілавіння ручаёчкі\\
Сыплюцца мукой...\\
\\
Саша ўгрэўся,\\
Ды трывае,\\
Дзеда словы паўтарае:\\
– Тут жа ў нас р-а-бо-ты!\\
Хопіць да суботы!\\
\\
Не ў суботу,\\
Што для слоўца,\\
Недзе пад абед\\
Вынес веснічкі-варотцы\\
З-пад паветкі дзед.\\
\\
Нёс памалу,\\
Не спяшаўся,\\
Хітра паглядаў,\\
Як за іх\\
Унук трымаўся –\\
Несці памагаў!\\
\\
Да штыкетніка прынеслі\\
І ўздыхнулі:\\
– Ух!\\
І да шулачка завесы\\
Прыбівалі ўдвух.\\
\\
Дзед на рукі ўзяў малога,\\
Прытуліў ямчэй:\\
– Трэба будзе дапамога, –\\
Пазаву яшчэ!

 


===== Падобныя старонкі =====
  * [[творы/мікола-чарняўскі/мікола-чарняўскі-змайстравалі-сані]]
  * [[творы/міхась-чарняўскі/міхась-чарняўскі-вогнепаклоннікі]]
  * [[творы/мікола-чарняўскі/мікола-чарняўскі-вясёлка-над-полем]]
  * [[творы/мікола-чарняўскі/мікола-чарняўскі-ёлка]]
  * [[творы/мікола-чарняўскі/мікола-чарняўскі-акадэмія-на-колах]]