~~META:
title = Мікола Чарняўскі — Аб чым пяе крынічка
&keywords = бяру, людзі, спеў, сілу
&abstract = Верш Міколы Чарняўскага "Аб чым пяе крынічка"
&iftrue = nan
~~

====== Мікола Чарняўскі — Аб чым пяе крынічка ======
І хмарным вечарам, і ўранні –\\
Заўжды, як срэбра, плынь мая.\\
Хто замаркоціцца, прыстане, –\\
З глытком вады\\
Дам сілу я.\\
\\
Журчу, жвірком шуршу, вірую –\\
Такі мой лёс,\\
Такі мой плёс.\\
Дзе чысціню сваю бяру я?\\
У рос,\\
У зорак,\\
У нябёс.\\
\\
Здалёк чуваць мой спеў вясёлы,\\
Ён звонкі ў спёку і ў мароз.\\
Дзе я бяру свой спеў, свой голас?\\
У траў,\\
У птушак,\\
У бяроз.\\
\\
З глыбінь да сонца шлях прабіла,\\
Каб рады людзі мне былі.\\
Дзе я ўзяла такую сілу?\\
У роднай матухны-зямлі.\\
Жыць буду я, бо я – крыніца!\\
Квітнець зямлі,\\
Рунець вясне!\\
\\
Бяру я сілу –\\
У зямліцы,\\
Зямля ж і людзі –\\
У мяне!..\\


 


===== Падобныя старонкі =====
  * [[творы/мікола-чарняўскі/мікола-чарняўскі-змайстравалі-сані]]
  * [[творы/міхась-чарняўскі/міхась-чарняўскі-вогнепаклоннікі]]
  * [[творы/мікола-чарняўскі/мікола-чарняўскі-вясёлка-над-полем]]
  * [[творы/мікола-чарняўскі/мікола-чарняўскі-ёлка]]
  * [[творы/мікола-чарняўскі/мікола-чарняўскі-акадэмія-на-колах]]