~~META:
title = Мікола Мятліцкі — Я дрэву сказаў...
&keywords = стаю, любіў, свеце, адзіны, сонца
&abstract = Чытаць верш Міколы Мятліцкага "Я дрэву сказаў..."
&iftrue = nan
~~

====== Мікола Мятліцкі — Я дрэву сказаў... ======
Я дрэву сказаў: як самотна табе\\
Гадамі на месцы нязрушна стаяць,\\
I гнуцца пад ветрамі хлёстка ў цяжбе,\\
I ў далечы толькі паглядам крыляць.\\
\\
I дрэва сказала мне: іншых выгод\\
Напоўніцу маю без ліку я дзён.\\
Мне бачыцца сонца адзіны ўзыход,\\
I захад мне сонца адзіны відзён.\\
\\
Няхай і прыкута пад небам стаю,\\
Ды ў глебе радзіннай мае карані.\\
Любіў бы ты гэтак радзіму сваю,\\
Не збег бы адгэтуль павек, не мані!\\
\\
Быў тут бы заўсёдна, не ў свеце кружыў,\\
Прыняўшы вандроўца здарожаны лёс.\\
Любіў гарачэй бы і ўзрушней тужыў,\\
Не зведаў, магчыма б, чарнобыльскіх слёз.\\
\\
Ты ў свеце, блукаючы, рушыў і сек,\\
Ля прорвы нябыту паўстаў на краю.\\
За твой над прыродай учынены здзек\\
Я ў атамным пекле сягоння стаю.\\
\\
То вецер атрутны лісцё калыхне,\\
То промень пякучы усчнецца сляпіць.\\
Раз першы за век захацелася мне\\
Хоць некалькі крокаў ад зоны ступіць.

\\
\\
Крыніца: Прайсці праз зону. Кн. 2. Проза, паэзія, публіцыстыка / Уклад. І. Бутовіч; Маст. В. Шкаруба. Мн.: Маст. літ., 2001. – 558 с.

 


===== Падобныя старонкі =====
  * [[творы/пімен-панчанка/пімен-панчанка-аб-самым-смачным]]
  * [[творы/артур-вольскі/артур-вольскі-боль-чарнобыля]]
  * [[творы/іншае/сучасная-літаратура-беларусі/тэма-чарнобыля-ў-беларускай-паэзіі]]
  * [[творы/мікола-мятліцкі/мікола-мятліцкі-санеты-чарнобыля]]
  * [[творы/алесь-пісьмянкоў/алесь-пісьмянкоў-1986]]