~~META:
title = Мікола Мятліцкі — Пытанні
&keywords = красуня-вясна, спытала, хадзіла, ганулька, гамана, адказ
&abstract = Чытаць верш Міколы Мятліцкага "Пытанні"
&iftrue = nan
~~

====== Мікола Мятліцкі — Пытанні ======
Спытала Ганулька у кветак і траў:\\
– Скажыце, хто луг так прыгожа прыбраў?\\
Гаворыць дзяўчынцы вятроў гамана:\\
– Лугамі хадзіла Красуня-Вясна!\\
\\
Спытала Ганулька у шумных палёў:\\
– Хто фарбы такое пяшчоты знайшоў?\\
І чуе ў адказ зноў такое яна:\\
– Палямі хадзіла Красуня-Вясна!\\
\\
Спытала Ганулька ў зіхотнай ракі:\\
– Сінечу на хвалі праліў хто такі?\\
Ёй шэпча ў адказ лёгкіх хваль гамана:\\
– Хадзіла ўзбярэжжам Красуня-Вясна!\\
\\
А сонечны зайчык на шыбіну – скок.\\
Кульнуўся свавольна ён, слепячы зрок.\\
І жмурыцца Ганна: – Ды гэта ж яна,\\
Смяецца і скача, Красуня-Вясна!

 


===== Падобныя старонкі =====
  * [[творы/мікола-мятліцкі/творчасць-міколы-мятліцкага]]
  * [[творы/мікола-мятліцкі/мікола-мятліцкі-бяссмертнік]]
  * [[творы/мікола-мятліцкі/мікола-мятліцкі-усмешка-джаконды]]
  * [[творы/мікола-мятліцкі/мікола-мятліцкі-яніха]]
  * [[творы/мікола-мятліцкі/мікола-мятліцкі-чаканне-сонца]]