~~META:
title = Мікола Мятліцкі — Лясны калодзеж
&keywords = вады, гарэлі, сонечныя
&abstract = Чытаць верш Міколы Мятліцкага "Лясны калодзеж"
&iftrue = nan
~~

====== Мікола Мятліцкі — Лясны калодзеж ======
У спратах папараці – во дзе! –\\
Між каранёў-пляцёнак хвой\\
Лясны закінуты калодзеж\\
Вадой калышацца жывой.\\
\\
Старая конаўка збурэла,\\
Бяросты лушчыцца луска.\\
У хваляванні як нясмела\\
Бярэ цяпер яе рука.\\
\\
Ручэй – гарэзны сын крынічкі –\\
Ад зруба булькае ў траве.\\
I толькі восы, быццам знічкі,\\
Лятаюць-зумкаюць: – Жыве!\\
\\
Адбіўшы пасму аблачынкі,\\
Ты згадак пырскамі абдаў.\\
Мне не забыць тае дзяўчынкі,\\
Якой, было, вады падаў.\\
\\
Гарэлі сонечныя промні\\
На вуснах кроплямі святла.\\
Чароўны міг трапётка помню,\\
Як з белай конаўкі піла.\\
\\
Дзяркач пытае на балоце\\
Дзяркатым голасам бяды:\\
У лета ядзернай спякоце\\
Хто сёння ёй падасць вады?

 


===== Падобныя старонкі =====
  * [[творы/мікола-мятліцкі/мікола-мятліцкі-бяссмертнік]]
  * [[творы/мікола-мятліцкі/мікола-мятліцкі-чаканне-сонца]]
  * [[творы/мікола-мятліцкі/творчасць-міколы-мятліцкага]]
  * [[творы/мікола-мятліцкі/мікола-мятліцкі-яніха]]
  * [[творы/мікола-мятліцкі/мікола-мятліцкі-усмешка-джаконды]]