~~META:
title = Мікола Мятліцкі — Землякам
&keywords = землякі
&abstract = Чытаць верш "Землякам" Міколы Мятліцкага
&iftrue = nan
~~

====== Мікола Мятліцкі — Землякам ======
Расселеныя ў розныя куткі\\
Вясны жахотнай незваротным лёсам,\\
Нясеце душ самоту, землякі,\\
Ў мальбе чужым павыстылым нябёсам.\\
\\
На промнях смертаносных не згарэў\\
Уздых вятрысты адзінотных дрэў\\
I поле векавое не астыла.\\
Падворак хаты сумам забурэў,\\
Глядзяцца сцены родныя пахіла.\\
\\
Я вуліцай пустэльнаю іду,\\
Я слухаю жахотную бяду,\\
Выгнанніцкае долі чую крокі.\\
Здаецца: пахіснуся, упаду.\\
Накрыюць белым саванам аблокі.\\
\\
Як важка чуць бязмоўе цішыні,\\
Дзе ўзмах крыла ў крынічнай вышыні,\\
Дзе ластаўкі наіўна-ценькі шчэбет.\\
Тут лёг наўкруг,

укрыўшы карані,

Асфальт прачорны і халодны шчэбень.\\
\\
Я пастаю ля вашых сумных хат\\
На ветравеі ўсіх айчынных страт, –\\
Пачую, як мной страчана багата.\\
Дык вось яна: з усіх зямных адплат\\
Скразнога зла ліхвярная адплата.\\
\\
Калі гады, нітуючы вякі,\\
Нагамі ступяць зноў на бальшакі\\
Дазволена-спалошнага вяртання,\\
Вы прыйдзеце, я веру, землякі,\\
Да родных ніў з бязмоўнага кургання.

 


===== Падобныя старонкі =====
  * [[творы/мікола-мятліцкі/мікола-мятліцкі-усмешка-джаконды]]
  * [[творы/мікола-мятліцкі/мікола-мятліцкі-яніха]]
  * [[творы/мікола-мятліцкі/мікола-мятліцкі-чаканне-сонца]]
  * [[творы/мікола-мятліцкі/творчасць-міколы-мятліцкага]]
  * [[творы/мікола-мятліцкі/мікола-мятліцкі-бяссмертнік]]