~~META:
title = Мікола Мятліцкі — Дыпціх чакання
&keywords = Хойнікі, вёска
&abstract = Чытаць "Дыпціх чакання" Міколы Мятліцкага
&iftrue = nan
~~

====== Мікола Мятліцкі — Дыпціх чакання ======
**1. Вёска**\\
\\
Не паверу: ніхто не жыве\\
У хатах тваіх астыглых.\\
Крокі зноў чую – гэта\\
Вяртаюцца дадому з кладоў\\
Дзяды.\\
(Мулка ў магілах ім стала,\\
Гукаюць мёртвыя хаты.)\\
Бабуля мая Аксіння\\
Гоніць перад сабой\\
Чароды аблок –\\
З белага небнага раю.\\
Бацька з касой на плячы\\
(Вырваў з рук чорнае смерці)\\
Ідзе поплавам.\\
Маці...\\
З чым, мама, ты крочыш\\
На гэтым перасяленні памяці?\\
Што ў руках? Калыска\\
Маленькай памерлай дачкі...\\
\\
Жывіце!\\
Гэта вашая вёска.\\
Паспяшаліся выпісаць вас\\
У сельсавеце.\\
Я не магу бачыць вёску пустою –\\
Жывіце!\\
\\
...Час пашырае жылплошчу\\
Смерці.\\
\\
\\
**2. Прыпынак**\\
\\
Каторую ноч\\
Я выходжу на прыпынак аглухлы\\
За вёску і бачу адно:\\
Кроячы фарамі цемрадзь,\\
Гойдаючы на шыбінах водсветы,\\
Паяўляюцца з лясістай смугі\\
Аўтобусы,\\
I яркі агонь\\
Высвечвае шыльды-пазнакі:\\
«Чамкоў – Хойнікі»,\\
«Уласы – Хойнікі»,\\
«Масаны – Хойнікі»,\\
«Пагоннае – Хойнікі»,\\
«Аравічы – Хойнікі»...\\
\\
Яны скрыпуча тармозяць\\
На прыпынку сярэдначы,\\
І ўсё,\\
Гарбацячыся ў цемрыве ночы,\\
Спалошліва мкнецца ў раскрытыя дзверы –\\
Хаты і дрэвы,\\
Калодзежныя жураўлі і хмары,\\
Тарфяныя бугры\\
I ржавая каналаў вада...\\
\\
Пусткаю чорнай\\
Робіцца Бабчын.\\
\\
Аўтобусы,\\
Пускаючы дым,\\
Далей імкнуцца.\\
Ім багата каго падабраць\\
На гэтай дарозе...\\
А я адзін застаюся\\
Сярэдначы\\
Пасярод самай жудотнай\\
Пустыні свету,\\
Каб дачакацца,\\
Калі ж яны\\
Рушаць назад\\
З перавернутымі шыльдамі:\\
«Хойнікі – Чамкоў»,\\
«Хойнікі – Уласы»,\\
«Хойнікі – Масаны»,\\
«Хойнікі – Пагоннае»,\\
«Хойнікі – Аравічы»...\\
Калі высадзяць\\
I на гэтым прыпынку\\
Усё,\\
Што забралі, павезлі.

 


===== Падобныя старонкі =====
  * [[творы/мікола-мятліцкі/мікола-мятліцкі-яніха]]
  * [[творы/мікола-мятліцкі/мікола-мятліцкі-чаканне-сонца]]
  * [[творы/мікола-мятліцкі/мікола-мятліцкі-усмешка-джаконды]]
  * [[творы/мікола-мятліцкі/мікола-мятліцкі-бяссмертнік]]
  * [[творы/мікола-мятліцкі/творчасць-міколы-мятліцкага]]