~~META:
title = Мікола Мятліцкі — Баршчоўка
&keywords = Баршчоўка, АЭС, прагрэс
&abstract = Чытаць верш "Баршчоўка" Міколы Мятліцкага
&iftrue = nan
~~

====== Мікола Мятліцкі — Баршчоўка ======
//А. М. Сцепаненку//

Як блізка падступаецца прагрэс!\\
I што ў руках?\\
Магільная рыдлёўка...\\
Над Прыпяццю

зялёная Баршчоўка

За восем кіламетраў ад АЭС.\\
Наўкруг – лугі.\\
I пракаветны лес.\\
\\
Тут хвалі сіньку плёскала вясло,\\
Рука –

сяўбой зямлю спадзеўна грэла.

Туманам ранне золкае шарэла,\\
I мокла жураўлінае крыло.\\
Жыццё гуло...\\
Жыццё наўсцяж гарэла...\\
\\
Тут эпахальных не было падзей,\\
Былі радзіны і былі хаўтуры.\\
Праводзіў позірк воч старых пахмуры.\\
Цяжэлі рукі цвёрдыя людзей.\\
Ды ў памяці

вайны жылі віхуры.

\\
...Уздрыгнуў ноччу пракаветны лес.\\
I воблак белы, як світанне, вырас,\\
Як згубы кліч,

як смерці чорнай вырак,

За восем кіламетраў –

над АЭС.

Ён рос і рос

і накрап сеяў спрэс.

\\
А тут – душа закутая ў спакой –\\
Хадзілі лугам, плавалі ракой,\\
На пашу гналі вуліцай кароў,\\
Садзілі соткі

і... бялілі кроў.

I думалі: які ён, той прагрэс?\\
Ў глыбінцы свету...

Побач ля АЭС.

 


===== Падобныя старонкі =====
  * [[творы/алесь-пісьмянкоў/алесь-пісьмянкоў-1986]]
  * [[творы/артур-вольскі/артур-вольскі-боль-чарнобыля]]
  * [[творы/пімен-панчанка/пімен-панчанка-аб-самым-смачным]]
  * [[творы/мікола-мятліцкі/мікола-мятліцкі-санеты-чарнобыля]]
  * [[творы/іншае/сучасная-літаратура-беларусі/тэма-чарнобыля-ў-беларускай-паэзіі]]