~~META:
title = Мікола Гусоўскі — Урывак з паэмы "Песня пра зубра" (Неяк у Рыме пры сціжме людзей незлічонай...)
&keywords = Рыме, жывёлін, аблавы
&abstract = Чытаць урывак з паэмы Міколы Гусоўскага "Песня пра зубра" (Неяк у Рыме пры сціжме людзей незлічонай...)
&iftrue = nan
~~

====== Мікола Гусоўскі — Урывак з паэмы "Песня пра зубра" (Неяк у Рыме пры сціжме людзей незлічонай...) ======
Неяк у Рыме пры сціжме людзей незлічонай\\
Сведкам відовішча быў я – бою быкоў на арэне.\\
Люд пацяшаўся, гудзелі, як вулей, трыбуны,\\
Стрэлы ж і коп’і ўпіваліся ў цела жывёлін,\\
Боль прычыняючы ім невыносны. Пакуль мы глядзелі,\\
Як вар’яцеюць быкі і як бліскае ярасць\\
З позіркаў раненых, гул выклікаючы ў цырку, –\\
Хтосьці сказаў: «Як у нас на зубрынай аблаве».\\
Я пагадзіўся і там жа ў сваім асяроддзі\\
Усё расказаў, што і ў нас у змаганні зацятым\\
Гэткім жа чынам адольваюць дужага звера.\\
Як і гаворыцца ў прыказцы мудрай, язык мой\\
Мой жа быў вораг. Праслухаўшы ўсё ў захапленні,\\
Мне загадалі адразу ж узяцца за працу,\\
Каб успаміны свае, пераліўшы ў памер вершаваны,\\
Песняй зрабіць і пра нас, і пра нашы аблавы.\\
Бачыце, я, між паэтаў часовы абраннік,\\
Вымушан скласці свой спеў аб краіне з багаццем\\
Свету жывёльнага ў ёй, бо і звер гэты цудам\\
Толькі шчэ ў нас захаваўся пад зоркай Палярнай.

 


===== Падобныя старонкі =====
  * [[ibdc.ped>у-белавежскай-пушчы]]
  * [[ibdc.ped>гаспадар-пушчы]]
  * [[творы/мікола-чарняўскі/мікола-чарняўскі-каго-баіцца-зубр]]
  * [[ibdc.ped>крэпасць-на-мяжы]]
  * [[ibdc.ped>зубрыная-сцежка]]