~~META:
title = Максім Танк — Спатканне
&keywords = вочы, мокрыя, стары, слёз, плач, крат
&abstract = Чытаць верш Максіма Танка "Спатканне"
&iftrue = nan
~~

====== Максім Танк — Спатканне ======
– Ну што ж, кажы, што ў вас чуваць? –\\
Пачаў стары пра сенажаць,\\
Успомніў жыта і авёс...\\
А вочы... мокрыя ад слёз...\\
\\
А потым я загаварыў:\\
– Нічога, год я перажыў.\\
Ды не адзін – сядзіць нас шмат, –\\
Прывыклі трохі і да крат...\\
\\
Ну, як там мама і сястра?\\
Пара ўжо на зіму араць.\\
I як там кратаецца дзед?\\
Ім занясі ад нас прывет!\\
\\
– Нічога, мы-то жыць жывём, –\\
Вось ты тут сохнеш за муром...\\
Я ў торбе сухароў прынёс, –\\
А вочы мокрыя ад слёз...\\
\\
– Не плач! Мы вернемся вясной\\
I ў поле выйдзем грамадой,\\
Сустрэнем новы ўсход зары, –\\
Не плач і не бядуй, стары!\\
\\
Вясною светлаю з-за крат\\
З сяўнёю, поўнаю зярнят,\\
Нас выйдзе шмат, як цёмны бор,\\
На скібы чорныя разор...\\
\\
Стары, я знаю, верыць мне\\
I сам гаворыць аб вясне,\\
Здаецца, падужэў, падрос,\\
Хоць вочы мокрыя ад слёз...\\
\\
1936

 


===== Падобныя старонкі =====
  * [[постаці/максім-танк]]
  * [[творы/максім-танк/давераснёўская-творчасць-максіма-танка]]
  * [[творы/максім-танк/ідэйны-змест-паэмы-максіма-танка-люцыян]]
  * [[творы/максім-танк/матывы-і-вобразы-паэзіі-максіма-танка]]
  * [[творы/максім-танк/жыццё-і-творчасць-максіма-танка]]